Goreyê raporê DGFyî mîyanê serra 2023î de 280 rojnamegerî vejîyayê verê mehkeme, 57 rojnamegerî zî hepisxaneyan de yê.
Komeleya Rojnamegeran a Dîcle-Firatî (DFG) bi minasebetê serrgêra 4ine ya ronîyayîşê xo bînaya xo ya Dîyarbekirî de ''Raporê Binpaykerdişê Heqanê Rojnamegeran ê 2023yî" eşkera kerd.
Hemserekê DFGyî Serdar Altan, endam û îdarekarê komele û xeylêk rojnamegerî semedê aşkerekerdişê raporî ameyî yewca û beyanatêk day çapemenî.
Rojnameger Hakki Boltanî rapor wend va: ''Goreyê Federasyonê Rojnamegeran ê Mîyanneteweyîyî (IFJ) 2023 de 11ê ci cinî 120 rojnamegerî ameyî qetilkerdiş û se ra 68ê înan Gazze de kişîyayê. 2023 de Erdlerzê Mereşî de 25 xebatkaranê çapemenîye merdê. Sey serranê bînan 2023 de zî rojnamegerî raştê teda, hêriş, destbendkerdiş û tepiştişî ameyî. 2022 û 2023 de operasyonanê vera rojnamegeranê kurdan de xeylêk embazê ma tepişîyayî. Hemsereka DFGyî Dîcle Muftuoglu zî mîyanê nînan de ya û hema zî zîndan de ya. 2023 de 280 rojnamegerî ameyî muhakemekerdene, 36 rojnamegerî raştê hêrişî ameyî, 119 rojnamegerî ameyî destbendkerdene, 36 rojnamegerî zî hepisxane de yê.''
