Îraq û Herêma Kurdîstanî de siba weçînayîşê Parlamentoyê Îraqî virazîyenê. Vengdayîşo taybet, vizêr saete 07:00 de dest pêkerd û heta saete 18:00 bi tewrbîyayîşê yew mîlyon û 313 hezar û 980 kesan ê hêzanê asayîşî yê Îraq û Herêma Kurdîstanî ame kerdene.
Siba zî vengdayîşo pêroyî virazîyeno. Pêroyî de heqê 21 mîlyon û 404 hezar kesan esto ke rayanê xo bişuxulnê.
Seba girewtişê 329 kursîyanê Parlamentoyê Îraqî, 31 tifaq, 38 partî û 75 namzedê xoserî, ke pêro pîya 7 hezar û 769 namzedan ra yenê pê, do mîyanê pêşbazîye de bibê.
Prosesê weçînayîşî, pêroyî Îraqî de 809 merkezanê vengdayîşî de do bêro kerdene û 4 hezar û 501 sindoqê vengdayîşî do bêrê ronayene.
Vengdayîş siba saete 07:00 de do dest pêbikero û heta saete 18:00 do dewam bikero. Pawîyeno ke 24 saetan ra dima netîceyê weçînayîşî bi hawayêko nêresmî bêrê parekerdene.
