Derheqê Serekê Pêroyî yê Partîya Zaferî Umît Ozdagî de, seba parekerdişanê ey ê medyayê sosyale yê derheqê Şêx Seîdî de, bi sûcê "bi eşkera heqaretkerdişê yadê merdî" bi waştişê cezaya zîndanî îddîaname ame hazirkerdiş.
Îddîanameyo ke hetê Serekdozgerîya Komare ya Xinûsî ra ame hazirkerdiş de, ame vatiş ke Ozdagî 9ê Teşrîna 2024î de platformê medyayê sosyale X ser o parekerdişê xo de seba Şêx Seîdî îfadeyê "xayînê welatî", "kutikê emperyalîzmê Îngilîzan" û "qatilêko alcax" xebitnayê. Ame qeydkerdiş ke tehqîqat şîkayetê torinê Şêx Seîdî Bedrî Firatî ser o ame destpêkerdiş.
Dozgerîye ra waştişê zîndanî
Dozgerîye, da zanayîş ke parekerdişî bi awayêko eşkera ameyê kerdiş û hetê xeylê kesan ra ameyê vînayîş, û nê îfadeyî çarçeweyê maddeya 130. ya Qanûnê Cezayî yê Tirkî de sey "onurşiknayox, şeref û haysîyetzerarî" ercna. Ozdağî rê mabênê 3 aşman û 2 serran de cezaya zîndanî amey waştiş.
Tornê Şêx Seîdî Mehmet Kasim Firatî zî hesabê xo yê medyayê sosyale ser o parekerdişê xo de va: "Behr bi devê kûçik naherime. (Derya bi aweşimitîşê kutikî ra gêmar nêbeno.) Kesê ke ziwanê xo dergê Şêx Seîd Efendîyî kenê û heqaret kenê, wa bizanê ke ma tu wext zalimanê ceberûtî û paştîgeranê înan ra nêtersenê. Şêx Seîd Efendî, onurê şarê Kurdî û bawermendan o.