Serekê Pêroyî yê CHPyî Özgür Özelî semedê qayûmo ke hetê AK Partî ra tayînê Şaredarîya Colemêrgî bîyo beyanatêk da.
Özgür Özelî "Ma sîyasetê qeyûman red kenê. Qeyûmo ke ameyo wazîfekerdiş gere peyser bêro girewtiş. Zanîyeno ke derheqê serekê Şaredarîya Colemêrgî Mehmet Siddikî de 10 serrî verê cû dewa ameya kerdiş. Û na dewa hema zî dewam kena. Bi nê bahaneyî qeyûm tayîn kerdê. Ma qebûl nêkenê û red kenê. Gere qeyûm wazîfe ra bêro girewtiş. Ma kişta demokrasî û îradeyê şarî de ca gênê. Ma vera hişmendîya qeyûman de yê"
Çi bibi?
Netîceya weçînayîşanê 31ê adare de namzedê DEM Partî Mehmet Siddil Akiş bibi hemşaredarê Colemêrgî. Akiş serê sibayî Wan de ame destbendkerdene. Dima şaredarîye gêrîyaye binê ablûqa.
Wezîrîya Karanê Zereyî pare kerd ke Şaredarîya Colemêrgî ya DEM Partî rê qeyûm ameyo tayînkerdene. Wezîrîye va ke, bi îdîayanê 'endamî, propaganda û îdarekarîya rêxistine' derheqê Akişî de dosyayê dewa estê.
Derheqê Akişî de bi îdîaya 'endamîya rêxistine' tehqîqatêko newe zî ame akerdene.
Qeyûm ame tayînkerdene
Walîyê Colemêrgî Alî Çelîk zî sey qeyûm ame tayînkerdene.
Avûkatê Akişî Azad Onerî derheqê rewşa muwekîlê xova: ''Dosya ser o qirarê nimitişî est o. Tehqîqat 'bi hawayêko nimite' yeno kerdene. Eşkera yo dozgerîye û hêzanê asayîşî pîya dosya amade kerda.''
