Baroya Amedî, seba serrgêra kişîyayîşê Serekê Baroyî Av. Tahir Elçiyî hazirîya xo qedîna. Elçiyo ke 1966 de Cizîra Botan de ameyo dinya û bi xebatanê xo yê warê huqûqî ameyêne naskerdiş, do bi çalakîyanê cîya-cîyayan bêro vîrardiş.
Bername do Salona Konferansî ya Tahir Elçiyî ya Baroya Amedî û dorûverê Mînareya Çarlinge de virazîyo.
27ê Teşrîna Peyêne: Roja yewine ya bernameyî de saete 14.00 de mojnayîşê belgeselê bi nameyê "Saeta Şikîyayîye" (Kırık Saat) esto. Dima zî bi beşdarîya Rojnameger-Nuştox Burcu Karakaşe, Hemserekê Pêroyî yê ÎHDyî Av. Cihan Aydin û Serekê Weqfa Mezopotamya Av. Gevriye Atli, panelê bi nameyê "Rayîrê Heqîqetî de Tahir Elçi" do bêro kerdene.
28ê Teşrîna Peyêne: Verê Mînareya Çarlinge, Roja dîyine de saete 10.15 de verê Edlîye ra heta Mînareya Çarlinge rayîrşîyayîş do bêro kerdene. Saete 10.53 de verê mînare de vîrardiş esto. Bername saete 13.45 de bi zîyaretê mezelê Elçiyî do dewam bikero. Çalakîya peyêne ya roje zî, salona konferansî de dîwanê dengbêjan o.
30ê Teşrîna Peyêne: Turnuvayê Satrançî Bernameyê vîrardişî, 30ê Teşrîna Peyêne Roja Yekşemeyî saete 09.00 û 19.00 mîyan de bi Turnuvayê Satrançî yê ke do Salona Tahir Elçiyî de bêro kerdene, do biqedîyo.