Tepişteyo nêweş Mehmet Saît Yildirim (74) ke Hepisxaneyê Kiriklarî ya Îzmîrî de hucreyê yewkesî de yeno tepiştene, tehlîyeya ey hetê Heyetê Çimdarî yê hepisxaneyî ra reyna ameye astengkerdene.
Yildirim, 31 serrî yo zindan de yo. Cezaya ey 27ê Sibata 2025 de qedîyêne, la seba ke 'poşman nêbi', 9 aşmî amebî taloqkerdene. Qerarê Yildirimî do 25ê Tebaxa 2026 de reyna bêro ercnayene.
Sebebê qomîkî: Seyîd Riza û Fotografî
Heyetî seba taloqkerdişê tehlîyeye sebebê ecêbî mojnay:
Qiseykerdişê Telefonî: Yildirimî telefon de seba yew dezgehê çapemenîye vato "televîzyonê ma, rojnameyê ma". Heyetî no sey 'têkîlîya rêxistine' hesibnayo.
Fotografî: Heyetî fotografê Sakîne Cansiz, Fîdan Dogan û Leyla Şaylemeze ke dêsê qawîşî de daliqnayeyî bîy, sey sebeb mojnay.
Vateyê Seyîd Rizayî: Yildirimî seba teselîdayîşê birayê xo vateyê Seyîd Rizayî şuxilnayo: "Ez vera hîle û zûranê şima de serkewte nêbîya, no mi rê bi derd; la mi zî vera şima sereyê xo nêtewna, no zî wa şima rê bibo derd." Heyetî no vate zî sey 'têkîlîya rêxistine' qebul kerdo.
"Şima wazenê bi mergê xozayî îdam bikerê"
Yildirimî bi rayîrê avukata xo Fatma Demirere bianet rê qisey kerd û va: "Mi serra 1996 de cezaya îdamî girewte, dima çarnay hepisê muebbetî. 30 serran ra dima ganî ez bivejîyêne. Şima bi nê kayan wazenê cezaya îdamî bîyarê ca. Eger şima wazenê îdam bikerê, bi camêrdî vajê. Hewş de sehpa ronê û mi îdam bikerê, bi eşkerayî vajê 'ma îdam kerd'."
Yildirimî qiseykerdişê xo wina qedîna: "Min pî û kalanê xo ra di mîrasî girewtî. Yew nêweşîya zerrî (qelbî), yew zî rûmetê mi. Ez tîya bimiri zî ez rûmetê xo binpay nêkena û bi rûmet tîya ra vejîyena. Qet yew hêz nêeşkeno îradeyê şorişgero ke emrê xo fedayê azadîya şarê xo kerdo, bişikno."
Çimeyê xebere: Ayşegül Başar / Bianet
