Merkezê Cigêrayîşan ê DÎSK/Bîrleşîk Metal-Îşî (BÎSAM) raporê xo yê sinoranê veyşanîye û feqîrîye yê Aşma Tebaxa 2025î eşkera kerd. BÎSAMî da zanayene ke seba ke yew keyeyo ke 4 kesan ra yeno pê, bieşko weşîya xo biramno û debara xo bikero, ganî aşme de seba werdî 26 hezar û 149 TL xerc bikero. No reqem aşma verêne 25 hezar û 952 TL bi.
Ame vatene ke wexto ke mesrefê mecbûrî yê perwerdeyî, weşîye, banî, resayîşî, germbîyayîşî ûsn. zî yenê ser, no mesref beno 90 hezar û 450 TL.
Rapor de ame îzahrkerdene ke seba ke yew keso tena bieşko îhtîyacanê xo yê şexsîyan bica biyaro, aşme de tewr tay hewcedarîya ey bi 42 hezar û 234 TLî esta. No reqem aşma Temmuze de 42 hezar û 4 TL bi. Goreyê daneyanê BÎSAMî; mesrefê rojane 871 TLî vîyarna.
