ZAZAKÎ NEWS - Dewa Hersinkî ya Xarpêtî de, xebatanê kendişî de hemamêko tarîxî yê dewrê Roma ame vînayîş. Xebatê kendişî, badê ke serra 2023î de yew citkarî herême de rastê mozayîkan amebi, dest pêkerdbî.
Arkeologan hemamo ke tarîxê ey reseno hezar û 700 serran verî, kişf kerd. Goreyê pisporan, no hemam seba tabaqaya serdeste ya ê wextî ameyo viraştiş û herême de tewirê xo de nimûneyo yewin o.
Hemamo ke 75 metrekareyan ser o awan bîyo, hîrê qismanê serekîyan ra yeno pê; qismo serdin, qismo germin û qismo honik. Heto bîn ra, sîstemêko averşîyaye yo bin ra germkerdişî, odeyê areqdayîşî, hewzî û kanelê awe yê pak û lêşinî estê.
Mudirê Kultur û Turîzmî yê Xarpêtî Ahmet Demîrdağî derheqê muhîmîya vînayîşê hemamî de wina va:
“No, hemamo yewin o yê Roma yo ke na herême de ameyo vînayîş.
Hetê teknîkê ê dewrî ra çîyêko averşîyaye yo.”
Mesulê cayê kendişî Emre Çayirî zî bal ante muhendîsîya awanîye ser û va:
“Qismê ey ê germinî, serdinî û honikî bi yew muhendîsîyêka rinde resayê hetanî roja ma. Sîstemê ey o ke bin ra germ keno, xusûsîyetêkê Roma yo.”
Xebatê cigêrayîşî yê bi jeoradarî, dewa Hersinkî de 30 doniman ser o dewam kenê û yeno pawitene ke wextêkê nizdî de berhemê bînî yê tarîxî zî bêrê peydakerdiş.
