Amadeker: Konê Reş (Seba Zazakî Newsî açarnayox: Azad Zana)

Dr. Ehmed Nafiz Beg, ê tekoşînker û welatperweranê Kurdan ra yew o ke nameyê ey qet vîndî nêbîyo. Bi xususî mîyanê Kurdanê Rojawanê Kurdistanî de. Çunke o, hetê tedawîkerdişê şarê Cizîre ra yew rayberan ra yew bi. O lajê welatperwerê Kurd Yusuf Begê Zazayî bi. Yusuf Beg merdimêko kurdperwer û jîhat bi. Hetê dînî ra zî, alim û bawermend bi. Maden de roniştêne. Maden, mabênê wîlayetanê Amedî û Xarpêtî de ca gêno

Dr. Ehmed Nafiz Beg, serra 1899î de Maden de ameyo dinya. Wendişê xo Maden û Amed de temam kerdo û wendişê tipî zî Îstanbul de temam kerdo. Îstanbul de zî, tewrê karwanê welatperweranê Kurdan bîyo, sey keyeyê Cemîl Paşayî, Dr. Fuad Hacî Îbrahîm Efendî û tayê Bedirxanîyan.

Wexto ke Şêx Seîdê Pîranî dest bi serewedaritişê xo kerd, Dr. Nafizî zî pîya bi babî û merdimanê xo têkoşîn de cayê xo girewt. La peynîye de yenê tepiştiş. Serra 1928î de, Dr. Nafiz sey zafê welatperweranê Kurdan hepisxane ra vejîyeno.

O wext, Dr. Ehmed Nafizî destê birayê xo yê qijkekî Nûredînî (Dr. Nûredîn Zaza) girewt - o wext Nûredîn 11 serre bi - û 1ê Îlona 1930î de derbasê Sûrîye, bajaranê Heleb û Şamî bi. Şam de, mehelaya Arnûsî de yew "dermanxane" akerd. Û hetê karê doxtorîye de serektîya "Cimatê Hetkarîye Seba Belengazanê Kurdan ê Cizîre" kerde.

Peynîya serra 1932î de, bi doxtorê hukmatê Fransî dewa Eyndîwerî de, nizdîyê sinorê Tirkiya û Iraqî. Wexto ke kovara Hawarî 15ê Gulana 1932î de hetê Mîr Celadet Bedirxanî ra Şam de ameye çap û vilakerdiş, Dr. Nafizî "Goşeyê Doxtorîye" (Quncika doktorî) de nuşt.

Destpêkê serranê 1940an de, Dr. Ehmed Nafiz bajarê Qamişloyî de ca bi û uca de klînîkêka xo akerde.

Destpêkê serranê 1950an de, yew cinîya Xirîstîyan (filleh) bi nameyê Madam Îvon reyde zewijîya. Na cinîke ra hîrê tutê înan bîy, yew laj û di kênayî: Laj nameyê ey Cem o, nika bajarê Qahîre de maneno; kênayêke nameyê aye Hulya ya, nika Kanada de manena.

Serranê 1960an de, Dr. Nafiz nêweş kewt. Seba nêweşîya xo, keyeyê xo bar kerd Heleb û uca de klînîkêka xo akerde. Serra 1968î de, seba tedawîya canê xo şi Beyrût, Nêweşxaneyê Amerîka, la çi heyf ke uca de şi heqîya xo ser. Cinîya ey (Madam Îvon), waştişê ey ardî ca, cenazaya ey Beyrût ra arde Heleb û Heleb ra zî arde Qamişlo, mîyanê dost û nasanê ey, Şarê Cizîre.

Şarê Cizîrê, bi pêro mîletanê ke tede cuwîyayêne, Kurd, Ereb, Ermenî û Suryanî, pêşwazîya cenazaya Dr. Nafizî kerd û ey dewa Dugirî de, (ke rojhelatê Qamişloyî ra nêzdîyê 30km dûrî ya), hetê heval û dostanê ey sey Haco Axayî, Abdulrehman Axa Eliyê Ûnisî, Hemze Begê Miksî, Hacî Mûsa Begê Xuwêtlî, Hesenê Hacoyî, Arif Beg Abbasî de defin kerd.

Seke ma vat, Dr. Ehmed Nafiz Beg, doxtoranê Kurdan ê verênan ê Sûrîye ra bi, hem zî wareyê nuştişê bi ziwanê Kurdkî yê Latînkî de yewê verênan bi.

Roca ewroyîne de, yew nêweşxane bajarê Qamişloyî de bi nameyê ey esto. Hem zî, bi desan şarê Cizîrê nameyê ey domananê xo ser o ronawo û hema zî nam û vengê ey mîyanê şarê Cizîrê de vila yo. Sed rehmetî ruhê ey ser o bibarê, cenet ca û warê ey bo.