Amed de hetê Platformanê Dezgehanê Demokratîkan, Meclîsanê Ciwanan DEM Partî û DBP’yî de bi şîare ‘’Şayîyan Ciwananê Serkêşan û Komelê Demokratîkî’’ rayraşîyayîşêk virazîya.
Hemserekê DBP’yî Çîgdeme Kiliçgun Uçar û Keskîn Bayindir, wekîl û hemşaredarê DEM Partî û bi hezaran kesî ver bi Meydanê Peyasî şîyî.
Grûbe bi telefonanê xo kuçeyî roşnî kerdî. Dima ra meydan de konser dîya. Hunermend Kasim Taşdogan vejîya sehne ser û deyîrî vatî.
Hemsereka DBP’yî Çîgdeme Kiliçgun Uçar zî şayîye de qisey kerd û va: ‘’Vengdayîşê 27ê Sibate pêro dinya de veng vet û hêvîya cuya azadîye vete werte. Meclîs de komîsyonêk ronîyayo. Ganî no komîsyon bi gamanê cesuran têbigêro. Azadîye û serwerîya huqûqî bingeyê komelê demokratîkî û aştîye yê. Ma hêvî kenê ke partîyê sîyasîyî wayîrê prosesî vejîyê. Seserrêka bîne û erjê ke do vinî bibê çin ê.’’
Çîgdeme ra dima Koma Hevra deyîrî vatî û girseyî pîya govende girewte.
