Amedsporî, semedo ke vera heqaretanê nîjadperest û cînsîyetperestan ê vera Leyla Zanaye reaksîyonê xo bimojno, qerar da ke maçê Îdirsporî cinîyan rê bêpere bo.
Reaksîyonê vera tezahuratanê nîjadperest û bi heqaretan ê ke grûbêka terefdaranê Bursasporî musabeqaya Bursaspor-Somasporî ya 16ê Kanûne de vera sîyasetmedara Kurde Leyla Zanaye kerdbî, dewam kenê. Rayberdoxîya Amedsporî, vera nê hêrişan de yew qerarê paştîdayîşî yo bimana girewt û da zanayene ke maçê Amedspor-Îdirsporî yo ke do 28ê Kanûne de bêro kaykerdene, seba cinîyan bêpere yo.
Hetkare Sereke ya Amedsporî Şeyda Arslantaşê va, "Ma do bi zêdekerdişê hûmara cinîyan a trîbunan de cewabê tewr weşî bidê."
"Hêriş nasnameyê cinî û prosesê aştîye rê yo"
Hetkara Sereke ya Amedsporî Şeyda Arslantaşê derheqê babete de Ajansê Mezopotamya rê qisey kerd û va ke hêrişê vera Leyla Zanaye tesaduf nîyê, rasterast nasnameyê cinîye û mucadeleyê cinîya Kurde hedef gênê. Arslantaşê ard vîr ke trîbunanê Bursasporî de verê cû zî bi resimanê "Torosê Sipî" hêrişê nîjadperestî ameybî kerdene û wina va:
"Çi heyf ke trîbunê nê taximî de heqaretê yew sîyasetmedara cinîye yeno kerdene. Ma sey rayberdoxî û pêro dînamîkanê bajarî nê nêzdîbîyayîşî şermezar kenê. No hêriş, hêrişêko vera Prosesê Aştîye û Cimatê Demokratîkî yo ke herême de yeno rayberdene. Trîbunî eslê xo de prototîpê cimatî yê; uca cinî, camêrd, ciwan, kal û pîrî, her hetî yenê pêser. Vateyê nîjadperestî, rayberî û hêzê hereketê cinîya Kurde hedef gênê."
"Amedspor do wayîrê ercanê şarî bivejîyo"
Arslantaşe îfade kerd Amedspor bi serran o vera nîjadperestîye, cîyakerdişî û cînsîyetperestîye de mucadele keno û va, "Bi şexsê Leyla Zanaye de, nasnameyê cinîyan hedef ameyo girewtene. Amedspor; bi camîa, terefdar û rayberdoxîya xo do wayîrê ercanê şarê ma bivejîyo û paştîdayîşê prosesê aştîya cimatkî bidomno."
Vengdayîşê seba terefdaranê cinîyan
Arslantaşê seba maçê Îdirsporî yê 28ê Kanûne veng da pêro cinîyan û derheqê biletanê bêpereyan de nê malumatî pare kerdî:
"Ma wazenê vera nê hêrişî trîbunan de hîna zaf cinîyan bivînê. Terefdarê ma yê cinîyî şêrê merkezanê cinîyan ê şaredarîyan û numreyanê xo yê nasnameyî bidê. Ma do nê numreyan ser o tesbîtkerdişanê xo bikerê û seba cinîyanê ma îmkanê bîletanê bêpereyan virazê."
