Teqayîş, qezaya Çêrmûge ya Amedî de, tesîso ke tede penîr virazîyêne de ame meydan. Qazanê kalorîferî yê tesîsî teqa û netîce de 6 karkerî birîndar bîy.
Xeberdayîş ser o, ekîbê weşîye, cendirme û îtfaiye sewqê cayê hedîseyî bîy. Birîndarî bi ambulansan berdî Nêweşxaneyê Dewlete yê Çêrmûge.
Birîndaran ra rewşa 2 kesan giran bî, coka ê sewqê nêweşxaneyanê Amedî bîy.
Cenaze erşawîya Çêrmûge
Karkeran ra Taner Erkul (26) o ke Nêweşxaneyê Perwerde û Cigêrayîşî yê Gazî Yaşargîlî de tedawî dîyêne, merd. Cenazeya Erkulî badê kar û barê otopsî yê Sazîya Tipê Edlî, seba defnkerdişî erşawîya qezaya Çêrmûge.
Wayîrê karî ame tepiştene
Çarçewaya tehqîqatê "cinayetê karî" de, wayîrê tesîsî Mehmet Emin Varol o ke eynî wext de muxtar bi, ame dest sernayene. Varol, badê ke vejîya dadgeh, ame tepiştene û erşawîya hepisxane.
