ZAZAKÎ NEWS - Emîne Gunduza 76 serre, ya ke roşan de seba zîyaretê mezelan şîbî Dêrsim, hetê yew marê girdî ra lînga xo ra amey gazkerdiş. Tedawîya cinî nêweşxane de dewam kena.
Hedîse, dewa Kutudere de mezelxaneyê keyeyî de ame meydan. Cinîka ke hetê yew marê girdî ra amey gazkerdiş lezabez hetê lajê xo ra amey berdene Nêweşxaneyê Dewlete yê Dêrsimî. Tedawîya aye nika serwîsê daxilîye de dewam keno.
Emîne Gunduza ke ma ca piro, bi nê vateyan qalê ci kerd:
“Roşan de ez şîya zîyaretê mezelan, mi mûme tafîste. Mi awe ardêne û kerdêne mezelan ser. Mi ne mar hîs kerd, ne zî vengê ey eşnawit. Tena yewca de sey ke qirşûne ame eştene lînga mi. Wexto ke mi pantolê xo ra girewt û ant, lînga mi ra yew maro pîl kewt war. O kewt hard. Ez qîra û veng da lajê mi.
Marî hewl da ke hêrişê lajê mi zî bikero. Ey şîşeyê awe eşt ser, mar reyna nêvinderte, dima ra kerra (kemere) daye piro. Lajê mi, ez bi leza heta Kutudere ard. Yew het ra zî 112 reyde qisey kerdêne. Doktorê ke uca de bi, va lezabez bêrê. Rayîr de ambulans ame ma girewt. Cayê ke marî gaz kerdbi, ma ambûlans de şut û mudaxeleyo verên kerd.”
