Azad Zana
Sîyasetê Tirkiya û Kurdîstanî, rojê tarîxîyan ra derbas beno. Yew het ra, Partîya Karkeranê Kurdîstanî (PKK) bi merasîmêk îlanê çekveradayîşî kerd; hetê bînî ra, Heyetê Îmraliyî yê DEM Partî temasanê krîtîkan virazeno ke belkî kesî heta vizêr texmîn nêkerdêne. Înan ra yew pêvînayîşê bi Serekê MHPyî Dewlet Bahçelî reyde. Na rewşa newîye, hem berê hêvîyêka pîle akeno, hem zî pers û rîskanê ciddîyan xo dima ano. Seba ke ma na pêvajoye raşt fam bikere, ganî ma nê di hediseyan pîya biewnîyê.
Gama çekveradayîşî ya PKKyî
Gama çekveradayîşî ya PKKyî, tena yew hediseyo leşkerî nîyo. No, yew beyano sîyasî yo ke stratejîyêka newîye îşaret keno. Bi na game, PKK bi hawayêko eşkera mesaj dano ke o wazeno meydanê tekoşînî çekdarîye ra bianco meydanê sîyasî ya demokratîke ser. Tîya de rol, misyon û serekîya rayberê şarê Kurdî Abdullah Ocalanî zaf muhîn o. No tena yew gama taktîke nîya; yew îradeyo ke wazeno qederê persa Kurdan maseyê dîyalogî ser o çareser bikero. Labelê, sey ke Besê Hozate zî merasîm de ard ziwan, na game bêşert nîya; yew bingeyo huqûqî, qanûnî û sîyasî wazena. Na rewşe, topa erzeno meydanê dewleta Tirkiya û hukmatî. Gelo dewlete do vera na game se bikera?
Eynî wext de, temasê Heyetê Îmraliyî yê DEM Partî, bi taybetî pêvînayîşê bi Dewlet Bahçelî reyde zaf muhîm a. MHP, ke bi desan serran o vera hereketê Kurdan xeta tewr huşke de vinderto, çira bi heyetê DEM Partî reyde ronişt? No tewiro ke paradoksal aseno, eslê xo de nîşanê dînamîkanê neweyan o.
DEM Partî, bi nê pêvînayîşan mesaj dano ke prosesê aştîye û çareserîye nêşkeno tena mabênê di hetan de bimano. Seba ke aştîyêka mayînde bêro caardene, lazim o ke tifaqêko hîra û meşrûîyetêko cimatkî bêro awankerdene. Pêvînayîşê bi MHP reyde, hewldayîşêko cesûr o ke wazeno dîwarê înkarî birijno û nê prosesî sey "mesela Tirkiya" bimojno, ne ke "mesela terorî". Heyet, bi na raye wazeno ke heme partîyan bikero parçeyêkê çareserîye û îzolasyonê sîyasî bişikno.
Eke no proses bi ser bikewo, do seba Tirkiya û heme herême yew rîpelo newe abikero:
1. Qedîyayîşê şerî: Şerê 40 serran o ke hem zirarêko pîl o yê ekonomîk hem zî dejêko pîl o yê cimatkî aferna, eşkeno biqedîyo.
2. Qanûno bingeyên o newe: Dîyalogo ke dest pêkerdo, eşkeno rayîrê yew qanûnê bingeyênî (anayasa) yo newe, sivîl, demokratîk û zafrengî abikero.
3. Normalîzasyonê sîyasî: Sîyasetê Kurdan eşkeno warê demokratîke de bi temamî meşrû bibo û rolê xo yê esasî kay bikero.
Rîskî û astengî
Labelê, rayîrê aştîye dayîm duz nîyo û verê nê prosesî de astengîyê pîlî estê:
1. Bêbawerîya xorîne: Mabênê dewlete û hereketê Kurdan de yew bêbawerîya tarîxî esta. Gelo hetî do çi qas samîmî bê?
2. Provokasyonî: Hêzê tarî yê ke aştîye nêwazenê, eşkenê bi provokasyonan prosesî sabote bikerê.
3. Çarçewaya huqûqî: Heta ke gamê ke yenê eştene, bi yew çarçewaya huqûqî nêrê pawitene, proses şikdar maneno û şikîyeno.
Peynîye de, eşkeno bêro vatene ke Tirkiya yew demo tarîxî de ya. Gama PKKyî û temasê heyetê DEM Partî berê umîdî kerdê a. No ber, berê yew prosesêko zehmet, la zaf ercîyaye yo. Serkewtişê nê prosesî, pabesteyê cesaret, basîret û samîmîyetê heme hetan o.
