Azad Zana
Amnanî reyde, Dîyarbekir de hewa zaf beno germ û termometreyî bi 40-45 dereceyan ra zî vîyarenê. Na germîya zaf pîle, ne tena cuyê rojeyî kena çetin, belkî seba weşîya merdimî zî rîskanê cîddîyan ana pê. Bi taybetî rîskê tîjîrodayîşî, bêawîye (dehidrasyon) û pirsgirêkê zerrîye zêdîyenê.
Coka, ganî ma bala xo bidîme xo û dormeyê xo û bi tayê tedbîranê basîtan xo bipawe. Pisporê weşîye, seba ke ma nê rojanê german bi hawayêko weş û bêproblem bivîyarne, nê şîretan kenê:
1. Tewr muhîm: Bol wwe bişîmê!
Bedenê ma germ de zaf awe vîndî keno. Coka, ganî ma her roje tewr tay 2-3 lître awe bişime. Teberê awe de, şima eşkenê do, awa madenî yan zî şerbetanê bêşekeran ê ke keye de virazîyenê, înan bişimê. Xo çîyanê şekirinan, gazozan û zaf çay û qehwe ra dûrî bigêrê, çimkî ê bedeni hîna zî bêawe verdenê.
2. Saetanê krîtîkan de teber mevejîyêne
Saetanê ke tîje tewr pêt a, yanî mîyanê saete 11:00 û 16:00 de, eke şima mecbûr nîyê, teber mevejîyêne. Kar û gureyê xo yan serê sibayî rew, yan zî wextê şanî de bikerêne. Eke şima mecbûr mendî ke bivejîyê, cayanê ke versîya ya, înan tercîh bikerêne û zaf binê tîje de mevinderêne.
3. Kincanê sivikan û Reng-Roşnan bidêne xora
Kincanê sivikan, hîryaan û reng-roşnan (sey sipî, bej) bidêne xora. Kincanê ke pembeyî ra yê, hîna baş ê, çimkî ê îcaze danê ke bedenê şima nefes bigêro û serdin bimano. Şapqe û çimşûşeyê tîje zî seba pawitişê xo muhîm ê.
4. Werdê sivikan biwerê
Germ de, werdanê rûninan û giranan ra dûrî vinderêne. Cayê înan de, fêkîyanê bi-awinan (sey zebeş/bostan, xîyar), sebzeyan û salatayan biwerêne. No hem bedenê şima serdin tepîşeno, hem zî hewcedarîya awe ya bedenî temam keno.
5. Bala xo bidê komanê rîskî!
Domanî, kal û pîrî (îxtîyarî), û kesê ke nêweşîyê înan ê kronîkî estê (sey nêweşîya zerrîye, şekirî, tansîyonî) vera germî de hîna zaf hesas ê. Coka, bala xo bidêne nê kesanê ke dormeyê şima de yê û înan zafêr hişyar bikerêne.
Nê şîretî zaf basît asenê, la seba pawitişê weşîya ma û embazanê ma zaf muhîm ê. Amnanêko weş û serdin bivîyarêne! Weşîye de bimanê!
