Enwer Yılmaz
Heyato modern, ma rê xeylê rehetîyan û lezetanê cîya bi cîyayan pêşkêş keno. Yew hamburgero germ, yew qehweyo ke ma rayîr ser o şimenê... Nê çîyê qijkekî, dem bi dem benê parçeyêkê roja ma. La gelo ma qet fîkîrîyenê, peyê nê lezetan de hîkayeya çi însanan esta?
Mi vizêr şaristan de cayêk de yew hamburger werd. Weş bi. La o tehmo weş fekê mi de zaf nêmend. Wexto ke ez vejîyaya teber, mi o lajeko ke zere de hamburgerî viraştêne, teber de dî. O, pîyê xo dir bi telefonî qisey kerdêne. Kincê ey pêro mîyanê rûnî de mendbî, solê ey sey ardî sipî bîbî. Vengê ey resifyêne û ser de rincanîyêka giran estbî. Pîyê xo ra vatêne,: "Bawo, ez êdî nêeşkena payan ser o vinderî..."
O wext , ez cayê xo de menda. Ma uca de bi keyfweşîye werdê xo werdêne, la ma qet nêdîyêne ke o werd mîyanê çi dej û zehmetîyan de, bi emegê çi însanan ameyêne verê ma.
No lajeko genc tena yew nimûne yo. Sîstemo kapîtalîst, yew perde anto mîyanê ma û emegdaran. Ma tena berhemo peyên, o pakêtkerde û xemilnaye vînenê; ma rincanî, rûno ke serê înan yo, dejê lînganê ke 10-12 saetan payan ser o vindenê, û bêhêvîya ke çimanê înan de kom bîya, nêvînenê.
Ma nêvanê wa kes nêşuxulyo. Xebate rûmet a. Însan bi xebatê xo xo payan ser o tepîşeno. La meseleya bingeyîne na ya: Gelo xebate, heqê xo gêna? Çerxa nê sîstemî wina gêrena ke, wayîrê karî yanî patronî, serê emegê nê gencan ra bi mîlyonan qezenc kenê, la nê emegdarî bi xo nêeşkenê peynîya aşme bîyarê yan zî bi rehetî îdareyê xo bikerê.
Wexto ke yew genc bivîno ke emegê ey pûç vejyeno, heqê ey yeno werdiş û sibarojêko roşn çin o, o wext se beno? O wext hêvîyê xo welatê xo ra birneno û verê xo dano teber. Ewro bi hezaran gencê ma wazenê ke şirê Ewropa. Sebebê nêy tena meseleya ekonomîke nîya; no, remayîşêko vera bêedaletîye yo. Ê fîkîrîyenê ke Ewropa de qaydeyî estê, heqê karkeran yeno pawitiş û eke ti bişuxulîyê, ti eşkena/î heqê xo bigêrî.
Wexto ke mi halê ê lajekî dî, o tehmê hamburgerî fekê mi ra şi. Çimkî mi o wext tena werd nêy, mi eynî wext de bêedaletî, kedwerdî û bêhêvîya yew neslî zî "werde". Çîyo ke destê ma ra yeno, belkî zaf çinî yo. La tewr tay, ma eşkenê na mesele ser o bifîkîrîyê û vengê xo veje. Ma ganî her wext vîrê xo de biarî ke peyê her lezetê ke ma tehm kenê de, belkî dejê yew însanê bînî nimite yo.
