Enwer Yılmaz
Hefteyê 27. yê Lîga 1. ya TFFyî, ewro tena yew musabeqaya futbolî nêna kaykerdiş; eynî wext de imtîhanêko zor yê mabênê di kulturanê kehenan ê futbolî yeno kaykerdiş. Mucadeleyo ke şar mîyan de ci rê “Derbîyê Kurdan” yeno vatiş, ewro şan saete 20.00 de Stadyumê Amedî de dest pêkeno.
Seba her di taximan zî nê 90 deqîqeyî, do qederê lîgî bewlî bikerê. Ganî ma raştîye vajê: Amedsporî di hefteyanê peyênan de 4 puanî kerdî vîndî. Çi heyf ke hem lîderî vînî kerd, hem zî taximî ser o zextêko cîdî virazîya. Rayîrê şampîyonîye de, telafîkerdişê vîndîbîyayîşanê wina, wexto ke hefteyî vîyarenî, hîna zor beno.
Tekane çare: Serkewtiş
Verê terefdaranê xo de seba Amedsporî tena yew tercîh esto: Serkewtiş û newe ra lîderî. Labelê reqîb, Wanspor o ke nê hefteyanê peyênan de zaf bi form o. Vera taximo ke bi lazimîya ci bi puanan esta û wazeno bikewo potaya play-offî, kaykerdiş qet asan nîyo.
Wexto ke ma ewnîyenê têverameyîşanê ê mabênê di taximan; 13 musabeqayan de Wanspor hîna serdest aseno. Vera 3 serkewtişanê Amedsporî de, Wansporî 5 rey serkewtiş girewto (5 maçî zî pîya-pîya qedîyayê).
Hîna muhîmêr; maçê nêmeyê verênî yê lîgî de Wan de Amedsporî bi skorê 3-0 vinî kerdbi. Maçê ewroyî seba Amedsporî tena yew “3 puan” nîyo, eynî wext de motivasyonê “rovanşê” ê mexlûbîyetê giranî zî yo.
Yeno zanayîş ke nêmeyê verênî yê lîgî de Îdareyê Wansporî, jestêko pîl kerdbi û bîletê deplasmanî seba terefdaranê Amedsporî kerdibi “21 TL” ke plakaya Amedî temsîl kena. Îdareyê Amedsporî zî cewabê na nazîkîye da û seba maçê ewroyî fîyetê bîletanê trîbunê meymanan kerd “65 TL” ke plakaya Wanî temsîl kena.
Xulasa; ewro şan Amed de do nefesî bêrê tepiştene. Amedspor seba ke mucadeleyê şampîyonîye de vajo “Ez zî esta”; Wanspor zî seba ke bîletê play-offî biko cêbê xo, do bivejîyê seha.
Wezîfeyo ke keweno milê terefdaranê Amedsporî; nê demê zorî de 90 deqîqa bi sebir o paştîdayîşê xo yê xurtî bimocno (bido hîskerdene). Ma hêvî kenê ke; nê vîrajê krîtîkî de, kamo ke xeletîye bikero canê ci do zaf bivêşo. Reyna zî "dostanîye" bo qezenc biko.
Serkewtiş Amedspor!
