ZAZAKÎ NEWS - Ewro şefeq Hemserekê Pêroyî yê Partîya Sosyalîste ya Bindestan (ESP) û Wekîlê Îzmîrî yê verên yê HDPyî Murat Çepnî û rojnamegerî zî tede xeylê kesî ameyî dest bendkerdiş. Ame musayîş ke derheqê 96 kesan de qerarê tepiştişî esto.
Partîya DEMî, weçînayîşanê herêmîyan ê 2024î de seba Hemserekîya Şaredarîya Pîle ya Îstanbolî Meral Danîş Beştaş û Murat Çepnî sey namzed mojnaybî.
Çarçeweyê operasyonî de eştî buroyê Ajansê Xeberan yê Etkînî (ETHA) ser û dest ronîya malzemeyanê ajansî ser û hesabê ey yê medyayê sosyale ameyî astengkerdiş.
Operasyona polîsan ke vera ESP, Federasyona Komeleyanê Cîwananê Sosyalîstan (SGDF), Meclîsê Cinîyan ê Sosyalîstan (SKM), Sendîkaya Limter-İşî ya pabesteya DİSKî, Ajansê Xeberan yê Etkînî (ETHA), Polen Ekolojî, BEKSAV û sazgehanê cîya-cîyayan ameye viraştene de xeylê kesî ameyî destbend kerdiş.
22 bajaran de operasyon
Operasyono ke merkezê ci Îstanbol o; Antalya, Semsûr, Riha, Rîze, Bursa, Wan, Tekîrdag, Dîlok, Samsun, Dêrsim, Meletî, Amed, Kocaelî, Yalova, Balikesîr, Denîzlî, Anqara, Îzmîr, Sakarya, Edene û Mêrsîn de ame ramitene.
Wezîrê Karanê Zereyî yê Tirkîya Alî Yerlîkayayî eşkera kerdbi ke operasyonanê ke merkezê ci Îstanbol o û 22 bajaran de vera “rêxistina çekdare MLKP” ameyê viraştene, tede 96 kesî ameyê tepiştene.
