Derheqê hêrişê vera rojnameger Hakan Tosunî de di kesî ameyî tepiştene; tedawîya Tosunî, o ke giran birîndar bîyo, beşa lezgîne de dewam kena.
Tedawîya rojnameger û çalakwan Hakan Tosunî, o ke qezaya Esenyurtî ya Stenbolî de raştê hêrişî amebi, Nêweşxaneyê Dewlete yê Çam Sakura de dewam kena.
Avûkat Hakan Bozyurt, endamê Komeleya Huqûqnasanê Hemdeman (ÇHD), tepiştişê di kesanê ke hêriş de ca girewtê, eşkera kerd.
Bozyurtî îfade kerd ke hedîse kuçeyê Mehmet Akîfî yê Esenyurtî de qewimîyaya û vat, "Hedîse vîyarte qeydanê edlî. Labelê, yeno vatene ke nasnameyê Hakanî erey ame tesbîtkerdene û seba naye erey keyeyê ey reyde têkilî ameya ronayene."
Avûkat Bozyurtî derheqê çarçeweya cipersayîşî de nê agahîyî pare kerdî:
"Dîmenê ke hedîse reyde eleqedar ê, dosya de estê. Labelê, seba ke temamîya hêrişî roşn biba, îfadeyê şahîdan û qeydê kamerayan lazim ê. Ma do waştişanê xo nê warî de pêşkêş bikerê. Heme delîlî û vatişê şahîdan zaf muhîm ê."
"Sey embaz û dostanê ey, ma vanê, 'Hakan Tosun tena nîyo.' Ma do nê prosesî heta peynî teqîb bikerê."
Çi Bîbî?
Stenbol de ekolojîst û rojnameger Hakan Tosun, şanê 10ê Teşrîna Verêne de wexto ke şîyêne hetê keyeyê xo yê Esenyurtî, maruzê hêrişî mendbi.
Diyar bibi ke Tosunî sereyê xo ra derbe werda û xemîyayo, kenarê rayîrî de ameyo dîyene.
