Mehmed Olmez
Gandaran ra tayê hucreyî sey yamyaman hucreyanê bînan wenê. No, “Hucreyê Yamyamî” çîyo ke zaf naturel o. Sey nimûne ganê ma de hucreyê gonî yê sipîyî hucreyanê gonî yê sûranê pîran her roje bi mîlyonan kişenê û wenê.
Çend cigêrayîşê Akademîyê Zanîstî yê Amerîka na babete kerda rojeva xo û cehd kenê ke genanê nê hucreyan reyde hucreyêkê kanserî biafirnê û tedawîyê nêweşîya girane de bixebitnê ke hucreyanê kanserî bi nê hucreyan bidê werdene.
Wayîrê nê fikrî Denise J. Montell û embazê xo vanê ke eke bieşkîyê ê hucreyan biafirnê, do nê hucreyê neweyî cîrananê xo biwerê û vernîya nêweşîye bigîrê û nêverdê ke nêweşî aver şêra. Xebate nika “Hucreyê Gonî yê Sipîyî” ke xora nê karî kenê la hucreyanê kanserî de bêtesîr ê, înan ser o ya ke nê hucreyê gonî bi genanê xo yê newe yê yamyamîye hêrîşê hucreyanê kanserî bikê ke vernîya nêweşî bigîrê.
Na proje de do hucreyê gonî yê sipîyî nêweşî/e ra bêrê girewtene û genetîkê înan bêrê newekerdene. Dima reyna enjekteyê nêweşî/e bibê ke na rey nê hucreyî rasterast hêrîşê hucreyanê kanserî bikerê û biwerê.
Afirnayoxê proje û tezî dîyar keno ke ê zaf bihêvî yê û do verê merre û xozan de biceribnê.
Eke na proje serkewte biba do bibo heyecanêko zaf pîl û seba însanan zî biba hêvîyêka girde.
