ZAZAKÎ NEWS - Goreyê raporê Rêxistina Heqanê Merdiman a Hengawî, Komara Îslamî ya Îranî, destpêkê na serre ra hetanî nika 800 kesî darde kerdê. 8 aşmanê vîyarteyan de, en kemî 30 tepişteyê sîyasî û mezhebî û eynî wext de 22 cinîyî û yew gede ameyî îdamkerdiş.
Goreyê raporî, 800 tepişteyanê ke ameyî dardekerdiş ra, 116 kesî Kurdî, 107 kesî Lorî, 92 kesî Belûçî û 82 kesî zî Tirk bî.
Heto bîn ra goreyê Hengawî, eynî dem de en kemî 46 welatîyê Efxanîstanî zî zîndananê Îranî de ameyî darde kerdiş.
Rêxistina Heqanê Merdiman a Hengawî, derheqê zêdîyayîşê hûmara îdamkerdişanê Îranî de hişyarî da û veng da heme rêxistinanê cimatê sivîlî û heqanê merdiman ê Îran û dinya ke vera nê kerdişanê Komara Îslamî ya Îranî vengê xo vejê.
