ZAZAKÎ NEWS - Artêşa Îsraîlî, nêzdîyê Nêweşxaneyê Şifayî yê Xezayî de çadirêka rojnamegeran rê hêriş kerd Netîceyê hêrişî de 5 rojnamegerî ameyî kişti. Înan ra di teneyî muhabîrê Al Jazeerayî bî. Îsraîlî kiştişê yewê înan qebul kerd û îdîa kerd ke o "endamê Hemasî" yo.
Goreyê agahîyanê ke rayedaranê Nêweşxaneyê Şifayî ra ameyî girewtiş, artêşa Îsraîlî rasterast çadira ke rojnamegerî tede bî, hedef girewt.
Hêriş de, muhabîrê Al Jazeerayî Enes El Şerîf û Mihemed Kurayka û pîya bi înan 3 kameramanê bînî ameyî kiştiş.
Artêşa Îsraîlî zî bi eşkerayîyêk qebul kerd ke înan Enes El Şerîf kişto û îdîa kerd ke Şerîf rayberê Hemasî bi û înan rê hêrişê bi roketan plan kerdêne.
Eşkerayîya Al Jazeerayî
Telewîzyonê Al Jazeerayî hêriş bi hawayêko pêt şermezar kerd. Al Jazeerayî îdîayê Îsraîlî yê derheqê Enes El Şerîfî de red kerdî û pare kerd ke o rojnamegerêko bêteref bi û ey tena raştîye vatêne.
Bi nê hêrişê Îsraîlî pîya, 7ê Teşrîna Verêne ya 2023î ra nata hûmara rojnamegeranê ke Xezayî de ameyî kiştene, bîye 237.
