Semedo ke nameyê Şêx Seîdî dîyayo Meydanêkê Dîyarbekirî, Fatîh Altayliyî ci rê heqeretî kerdî û nameyê Şêx Seîdî o ke mîyanê Kurdan de sey rayber û ercêko pîl yeno vînayîş ser o minaqeşeyî dewam kenî.
Rojnameger Fatîh Altayliyî ewro yew qiseykerdişê xo de heqaretê giranî Şêx Seîdî rê kerdî.
Verî zî Rojnameger Yılmaz Ozdîl, badê têdima Partîya Komînîst a Tirkîya, Serekê Zafer Partî Umît Ozdağ û tewr peynî Rojnameger Fatîh Altayliyî Şêx Seîdî rê heqeretê giranî kerdî.
Pêro zî îdîa kenê ke Şêx Seîdî wexto ke vera Komara Tirkîya serehewanayo, dewleta îngîlîstanî ra hetkarîye dîyo.
Partî, şexs û dezgeyê Kurdan wayîrê Şêx Seîdî vejîyenê?
Serekê Baroya Amedî Nahît Eren aşkere kerd ke, înan seba nê heqeretanê Fatîh Altayliyî dewa akerda û Altayliyî gerre kerd.
Partîya Seypeyî û Demokrasî ya Şaran DEM Partî zî derheqê heqeretê ke Şêx Seîdî rê bîyê de beyanatêk da û va ; "Şêx Seîd erjê şarê Kurdan o. Heqeretê ke ey rê yenê kerdene, şarê ma rê yenê kerdene. Ma nê heqeretan qebul nêkenê."
Partîya Welatparêzanê Kurdistanî (PWK) zî bi beyanatêk va; “Ma Fatîh Altayliyî şermezar kenê. Şêx Seîd rayberê neteweyî û ercê miletê Kurd o. Her heqareto ke Şêx Seîdî rê yeno kerdene, eslê xo de miletê Kurd rê yeno kerdene."
Hereketa Azadî zî aşkere kerd ke semedo ke Şêx Saîdî rê heqeret bîyo înan derheqê Fatih Altayliyî de dewa akerda.
Parlamenterê Hüda-Parî Serkan Ramanlıyî zî hesabê xo yê Xî ser ra ra hêrsê xo nîşan da û va “ Tayî wariştî Şêx Seîd Efendî rê heqeret kenê. Înan de şeref û hesîyet nêmendo. Ma do nê heqeretan qebûl nêkerê."
Heto bîn ra Parlamenterê ÎYÎ Partî Salîm Ensarîoglu zî wayîrê Şêx Seîdî vejîya û vera heqeranê vejîya û va "Şêx Seîd ercê ma yo"
La semedê nê wayîrvejyayîşê ey Vervatoxê ÎYÎ Partî Kurşad Zorluyî aşkere kerd ke, ê nê vatişanê Ensarîogluyî qebûl nêkenê û înan dosyaya Salîm Ensarîogluyî erşawita dîsîplîn.
Ey ra ver zî Parlamneterê Ak Partî Galîp Ensarîoglu zî wayîrê Şêx Seîdî vejyabi û vatbi, Şêx Seîd qîmetêkê Kurdan o, ey rê heqeretî nênê qebûlkerdiş.
Xebere: Zazakî News
