Avaşîn Yılmaz
Amed de nê rojanê peyênan ê aşma êlûle de pîya bi germo berz yo ke tesîrdar bi, hûmara nêweşê ke bi şîkayetê dişdare muraceatê Nêweşxaneyê Perwerde û Cigêrayîşî yê Gazi Yaşargilî yê Dîyarbekirî kerdî zêde bîye. Welatîyê ke bi şîkayetê dejê sereyî, germiya berze û bêqewetîye muraceatê servîsanê acîlî kenê, bitaybetî seatanê şanî de rêzê dergî virazenê. Nêweşxaneyanê bajarî de mîyanê servîsanê acîlî yê domanan de qerebalîxîye est a, heto bîn ra servîsanê acîlî yê pîlan de zî bi seyan nêweşî seba tedawîbîyayîşî rêze de pawenê.
Seba yew doktorî saete de 100 nêweşî
Qerebalîxîya mîyanê nêweşxaneyan, barê xebata xebatkerdanê weşîye zî zaf kerd. Doktorêko ke servîsanê acîlî de gureyeno, saete de nêzdîyê 100 nêweşî rê ewnîyeno. Kişta nê qerebalîxîye de, yew meseleya tewr girane ya ke nêweşî ri bi ri benê zî, serûm nêvênayîş o.
Nêweşî serûmî nêvênenê
Nêweşê ke Zazakî Newsî rê qisey kerdî, vatî ke ê diştare zaf giran ravêrenê, labelê semedo ke nêweşxane de serûm çin o, tedawîya serûmî nêbena.
Goreyê agahîyanê ke nêweşî dayî, doktoran vat ke semedo ke serûmî kêm ê, seba nêweşê normalî nêşenê bişuxulnî, serûmî tena seba cinîyanê diganan yenê şuxulnayene. Seba nêweşê ke tedawîya serûmî nêbena zî goreyê halê înan, derzî yenê kerdene û dima bi nuştişê dermanan yenê şawitene keyeyanê xo.
Na xebere bi destekê madî yê Sefaretxaneyê Almanya yê Anqara, çarçeweya 'Projeyê Xurtkerdişê Dezgehanê Medyaya Herêmî yê bi Wasitaya Mentorîya Mîyanneteweyîye û Vurnayîşê Dîjîtalî' de ameya amadekerdene, mesuldarîya muhtewayî aîdê dezgehê ma ya."
