ZAZAKÎ NEWS - Deyîrbaz, bestekar û nuştoxê tîyatroyan ê Libnanî Ahmad Kaabour; goreyê eşkerayîya ke keyeyê ey da, vizêr (26ê Adare) rîyê nêweşîya xo ra 71 serrîya xo de şi heqîya xo ser.
Mergê hunermendî, sey padîyayîşê dewrêk ame ercnayîş. No dewir, perwerde û rûhê neslêkê muzîkê protestî yê Ereban îfade kerdêne.
Goreyê xebera The New Arabî, keyeyê Kaabourî vato ke nimajê cenazeya ey do ewro Beyrût de bêro kerdene. Ame vatiş ke cenaze do Nêweşxaneyê Al-Makassedî yê mevkîya Tarîq el-Cedîdeyî ra bêra girewtiş, berê Camîya Al-Khashoggiyî û dima ra paytext de bêra definkerdiş.
Serewezîrê verên ê Libnanî Saad Harirîyî dima wefatê hunermendî peyamekê serweşîye (tazîye) pare kerd û Kaabour sey "şopêka roşne ya mîyanê rayîrwanîya hunerî" name kerd. Harirîyî va, Vengê kilamê ey r do qet bêveng nêmano û her tim kuçeyanê Beyrûtî de veng bido.
Kaabour têna muzîkcen nê, eynî wext de nuştoxê kayanê tîyatroyî û fîgurêko zaf muhîm ê cuyayîşê kulturî yê Libnanî zî bi. O, karîyerê xo yê kaykerdoxîye de (aktorîye de) zî îmzaya xo eştbî serkewtişanê pîlan. Fîlmê bi nameyê Carlosî de bi rolê karakterê Wadîh Haddadî ca girewtbi, ke no karakter serekanê Cepheya Xelesnayîşê Şarê Fîlîstînî (FHKC) ya yew bî.
Hem dinya de gêra hem zî bi paştîdayoxê Fîlîstînî
Kaabourî, pêro cuyayîşê xo yê hunerî de qise û eserê xo seba xoverdayîşê Fîlîstînî vatî; coka o zaf wextan şar mîyan de rasterast sey "Fîlîstînij" zî ameyêne zanayîş.
Hosta Kaabourî; başûrê Libnanî ra heta vakurê ci, xeylêk bajaranê Ewropa û seranserê dinayaya Ereban de bi seyan konserî daybî.
