Mihemed Kurdî
Dewleta Tirkîya semedo ke kultur, tarîx, deyîr û ziwanê Kurdan wertê ra wedaro û welatê ma de zî otorîte û serwerîya xo bido qebulkerdiş seserrî ra vêşêr o ke verba ma Kurdan de nîjadperestîyêka bê sînor bikar anê. Semedo ke "Nîjadperestî" îdolojîyê dewlete yo resmî yo ewro şar, çapemenîye sazî û komeleyê tirkîya zî bi eynî zixnîyetî galeyê Kurdan kenê.
Serekê Rûmetî yê Koç Holdîngî Rahmî Koçî 5ê Hezîrane de qezaya Balçova ya Îzmîrî de beşdarê akerdişê nêweşxaneyêko Emerîkî bibi. Koçî weyra de derheqê cênîyêka Kurd û doxtorêkî de wina vatibi;" Badê ke diktorî derdê cênîya Kurd goştarit, cira vato ke 'şira pey perdeyî de xo tazî bikera', cênî cira vata ke 'doxtor vernî de ti xo tazî biko'." Wexto ke Koçî enê heqaretî cinîyanê Kurdan kerdêne Binalî Yildirim serekwezîrê Tirkîya yê verên û merdimanê bînan yê dormeyê ey de zî bê eyb û şerm bi huyayîş goştaritêne. Badê ke heqeretên Koçî yê nîjadperestîye medyaya dîjîtalî ser o neşr bîyê zaf kes, partî, het û sazîyan reaksîyonê wişkî nîşan dayê û xebatnayoxan ra waşt ke şirketanê pabesteyê Koç Holdîngî boykot bikerê. Ancî zaf Kurdî û merdimê wayîrê wîcdanî semedê ena nîjadperestîye nerazîbîyayîşê xo mojna û waştê ke Koç cênî û şarê Kurdî ra ozirê xo biwazo. Bi pîlbîyayîşê reaksîyonan reyde wezîrê edaletî zî neçar mendî ke vera heqaretanê Koçî yên nîjadperestîye de tehqîqat bido destpêkerdene. Badê Koç Holdîngê hesabê xo yê fermî de nameyê Rahmî Koçî ser o medyaya dîjîtalî de yew twît vila kerd û bi di risteyan ozirê xo waşt o. La Rahmî Koço ke qisekerdişanê xo de cênîya Kurd kerdo armanc wextê ozirwaştişî de nameyê Kurdan bikar nêard, eno zî mojneno ke ozirwaştişê ci zerrî ra nîyo. Xora tay partî û baroyê vakurê Kurdîstanî dozgerîye de gerreyê Rahmî Koçî kerdê û waştê ke enê suco nîjadperest ke aramîya şar û komeleyê xerab keno bê ceza nêmano.
Edeb û Terbîye Bi Emr û Zengînîye Nîyo
Nîjadperestîye bexşêko xozayî nîyo eksê ci nêweşîyêka pîskolojîk û exlaqî yo. Rahmî Koç karmendêko zaf zengîn û namdar o, bi emrê xo zî zaf pîl o la çi heyfo ke hema zî edeb û terbîye ra parê xo nêgirewto, hema zî merdimîye ra parê xo nêgirewto, çimkî amênê ci xerab o. Bêguman eke heya, edeb û terbîye pê pereyan bi ameyêne rotêne Rahmî Koçî do xora bierînayêne, la semedo ke fikr, hişmendî û zîhnîyetê ci xerab o û haya ey, halê ey rê çin o. Rahmî Koçî bi nê heqaret û nîjadperestîya xo tenya cahîlîya xo nêmojna û eynî wextî de duşmenîya xo ya vera Kurdan dîyar kerdo. Helbet ma baş zanenê ke "Asinê xerabî ra şimşêrî baş nêvirazeno" yanê ma zîhnîyetê yê sey Rahmî Koçî baş şinasnenê û ma hêvîya başîyê zî înan ra nêkenê la wa her kes bizano hedê pîyê kesî zî nîyo ke bi heya û edebê cênîya Kurdî yarîyê xo bikerî.
Seba ke nê heqaretên nîjadperest meşrû nêbî ganî ma Kurdî zî vera nê nîjadperestîye de bêveng nêmanê, nerazîbîyayiş û reaksîyonê xo her ca de bimojnê/nîşan bidê. Helbet Rahmî Koç faşîsto verên nîyo ke şarê ma rê heqeret kerdo la eke ma ewro vera na nîjadperestîye de bêveng bimanê do hîna zaf faşîstê sey Rahmî Koçî şarê ma rê heqeret bikerê û ma qij bivînê. Aye semed ra ganî heme het û kesên ke xora vanê ma Kurd ê û ma însan ê vera na nîjadperestîye vengê xo berz bikerê û enê heqeretî qebûl nêkerê ke seba ke rayêkê bînî çew bêhedî û bêhurmetîyêko wina nêkero.
Semedo ke heqaret cînîyanê ma rê kerdo ez Rahmî Koçî, yê ke dormeyê ey de huyayêne, yê bi eşkera û nimitkî paştîya ey kenê û yê ke vera nê heqaret û nîjadperestîyê de bêveng manenê hemeyan lanet û şermezar kena. Cênîya Kurd esalet a, rûmet a û taca serê ma ya.
