Rayberê ruhanî yê Katolîkan Papa Leo yo 14in, zîyaretê xo yo verên ê fermî yê teberê Îtalya aşma ke yena do Tirkîya rê bikero. Ame vatiş ke Leo badê Tirkîya do ravêro Lubnan.
Goreyê zanayîşan, Leo do mabênê 27-30ê Teşrîna Peyêne de Tirkîya de û mabênê 30ê Teşrîna Peyêne - 2ê Kanûne de zî Lubnan de bo.
Goreyê ajansê xeberan ê Îngilîstanî Reutersî, Papa zîyaretê xo yê di welatan de behsê rewşa Xirîstîyananê Rojhelatê Mîyanênî bikero û vengdayîşê aştîye bikero.
Yeno vatiş ke Papa do seba pîrozkerdişê serrgêra 1700ine ya viraştişê konsîlê ekumenîkî yê verênî yê Îznîkî, Patrîkê Ruman ê Fenerî Bartholomeosî reyde bêro têhet.
Yew şêwirmendê Bartholomeosî, John Chryssavgisî, ajansê xeberan ê Îngilîzan Reutersî rê meyanatêk da û vat, “Zîyaretê verênî yê fermî yê Papa Leoyî ke Tirkîya rê bikero, hetê sembolîkî ra zaf xorî yo.”
Chryssavgisî wina dewam kerd: “Papa Leo bêguman keno ke yew dinya ke tede bawerîyê cîya-cîyayî estê û ganî heme merdimî bêferqê dîn û irqî têkilîya têduşî de pîya biciwîyê.”
