Tehqîqato ke tede şîrovekarê nêzdîyê îktîdarî Cem Küçük zî tewqîf bibi, mîyanê tehqîqatê ke hetê Serdozgerîya Cumhurîyetî ya Îstanbulî ra yeno rayberdiş de, pêşkêşkarê Beyaz TV Tahir Sarıkaya yo ke amebi destbendkerdiş, ame tewqîfkerdiş.
Tehqîqat hetê Bûroyê Tehqîqatê Sûcanê Rêxistinkerdeyan yê serdozgerîye ra yeno rayberdiş.
Küçük bi sûcdarîya "bi hawayêko eşkere vilakerdişê melumatanê xapanokan yê seba şarî" û "şantajî" 30ê Temmuze de amebi destbendkerdiş, 1ê Tebaxe de zî amebi tewqîfkerdiş.
Sarıkaya yo ke mîyanê eynî tehqîqatî de vizêr (3ê Tebaxe) amebi destbendkerdiş, bi sûcdarîya "şantajî" û bi waştişê tewqîfkerdişî sewqê hakimîye ame kerdiş. Hakimîya cezayî ya sulhî qerar da ke Sarıkaya bêro tewqîfkerdiş.
Goreyê xebera ANKAî, amebi îdîakerdene ke hesabanê banka yê Sarîkayayî de transferê peran estbî û ame îfadekerdiş ke yew perçeyê nê transferan sewbîna dewrê hesabanê peranê krîptoyî ameyê kerdiş.
