Rayberîya PKK, eşkerayîyêka çapemenîye ya ke Qendîl de da de, da zanayîş ke goreyê qeraranê Kongreya 12. ya PKK û bi tesdîqê Abdullah Ocalanî, hêzê rêxistine yê ke mîyanê sînoranê Tirkîya de yê, dest bi peyser-antîşî kerd.
PEYSER-ANCÎYAYÎŞ DEST PÊKERD
Eşkerayîye de ame vatiş ke peyser-ancîyayîş qedeme bi qedeme û goreyê "texwîmê stratejîkî" yo ke rêxistine qerar dayo, yeno rayraberdiş. Agahî de ame parekerdiş ke 25 gerîlayê HPG û YJA-Starî yê ke peyser ameyê antîş zî tewrê kombîyayîşê çapemenîye bîyê.
Eşkerayîye de nê vateyî ameyî şuxulnayene: "Na game, hem seba ke qerarê Kongreya 12. bica bêrê, hem zî seba ke prosesê çareserîya demokratîke aver şêro, yew gama tarîxî ya."
Metnê Tirkî yê eşkerayîye hetê Endamê Konseya Rayberdişî ya KCKyî Sabrî Okî ra, metnê Kurdkî zî hetê qomutananê YJA-Starî ra Vejîn Dêrsime ra ame wendiş. Sabrî Okî, eşkerayîya xo de nê vateyî ardî ziwan: “Ma pabesteyê qeraranê Kongreya 12. yê. Seba ke nê qerarî pratîze bibê, ganî nêzîbîyayîşê huqûqî û sîyasî bê erey mendiş bêrê mojnayiş. Seba averşîyayîşê prosesê aştîye û çareserîya demokratîke, ganî her kes bi hîşmendîya mesulîyetî hereket bikero.”
PKK, eşkerayîya xo de bale ante ser ke no proses tena eskerî nîyo, eynî wext de yew prosesê newe-ra-awanbîyayîşê komelkî û sîyasî yo. Eşkerayîye de vajîya "Peyser-ancîyayîş, beyanê îradeyî yo ke do rayîrê aştîye û çareserîya demokratîke akero", seba raya pêroyî ya mîyanneteweyî zî vengdayîşê paştîdayîşî ame kerdene.
Peynîya eşkerayîye de ame vatiş ke no qerar bi tesdîqê Abdullah Ocalanî şekil girewto û no qerar, seba ameyoxê muşterekî yê şaran gamêka tarîxî ya."
