Enwer Yılmaz
Rayîrê Amedî yê neweyî, semedo ke ser o tedbîrê asayîşî çin ê, bîyê sey yew "Ruletê Rûsî" û tim benê sebebê qezayan.
Amed beno pîl, bajar hîra beno, bulvar û rayîrê neweyî yenê viraştiş. Labelê aseno ke lezê nê pîlbîyayîşî û lezê tedbîranê asayîşî yew nîyê. Tayê nuqteyê bajarî, seba şofêran û peyayan, bîyê sey yew "Ruletê Rûsî".
Nimûneyo tewr eşkera mîyanê 24 saetanê peyênan de Mehleya Talaytepeyî, Bulvarê Prof. Dr. Necmettîn Erbakanî ser o qewîmîyay.
Vizêr eynî nuqte de di wesayîtî qeza kerdî. Hema 24 saetî ser ra nêvîyartî, eynî ca de vengê frênan û sîrenanê ambûlansan ame eşnawitiş. Na rey yew wesayîtêko tîcarî yo sivik û yew kamyonete kewtî têmiyan, wesayîtî hetî ser kewtî, dîregê refûjî rijîyayî û 3 kesî birîndar bîy.
Yew roje de, eynî nuqte de, di qezayê cîddî yê sey yewbînan ameyê meydan... No beno ke "tesaduf" bo? Yan netîceyê îhmalo ke qîreno yo?
Rayîrî "Emanetê Homayî " yê
Îsyanê welatîyan zaf eşkera yo: "Rayîr virazîya la tedbîr çin o."
Çîyê ke ma zaf bulvaranê neweyan ê Amedî de vînenê, çi heyf ke eynî yê. Asfalt yeno rokerdiş, rayîr seba trafîkî yeno akerdiş; labelê tedbir çin o, lembayê trafîkî çin ê, lewheyê îqazî çin ê. Şofêrî, nêeşkenê texmîn bikerê ke kamcîn hetî ra kam bivejîyo, kam do kamcîn ca de bivindero.
Halê Bulvarê Prof. Dr. Necmettîn Erbakanî, xulasa na bêplanîya pêroyî ya bajarî ya. Ramitişê wesayîtî hema vaje "Emanetê Homayî " yo.
Welatî û esnafê ke herême de cuwîyenê, rojan o ke îqaz kenê. Vanê: "Tîya rê lemba lazim a, sererastkerdişê kavşakî lazim o." Vizêr qezayan ra dima nê vengdayîşê xo newe ra kerdî la ewro eynî ca de yewna qeza bîye.
Ganî ma rayedaran ra bipersê: Seba ke yew kavşak de sîstemê sînyalîzasyonî bêro ronayîş yan zî lewheyê îqazî bêrê daliqnayîş, ganî a nuqte de çend qezayî bibê, çend merdimî birîndar bibê yan zî bimirê?
Ganî peynîya na bêserûberîye bêra ke şofêrê Amedî mîyanê tersa "do kamcîn ca ra wesayît bivejîyo" xo ser ra bierzê. Sere de nuqteyê Talaytepeyî, ganî pêro kavşakanê rîskînan de sînyalîzasyon û sererastkerdişê dormeyî lez bêro kerdiş.
Çunke çîyo ke şono, gan o û telafîyê ci zî çin o. Rayîr medenîyet o; la eke ewle bo...
