ZAZAKÎ NEWS - Mêrsîn de hêrişo nîjadperest: "Îta Komara Tirkiya ya, şima senî bi Kurdkî qisey kenê?"
Mêrsîn de, yew keyeyo Kurd o ke 8 kesan ra ameyêne pê, wexto ke gêrayîş ra agêrayêne, rastê hêrişêko nîjadperest ame. Goreyê agahîyan, sebebê hêrişî qiseykerdişê bi Kurdkî bi û muxtarê dewe zî mîyanê hêrişkaran de bi.
Hedîse vizêr, dewa Kîsecîkî ya qezaya Çamliyaylayî ya Mêrsînî de, saete 17:30 de ame meydan.
Goreyê xebera Ajansê Mezopotamya (MA), yew grûba nîjadpereste, ke muxtarê Kîsecîkî zî tede bi, hêrişê keyeyî kerd. Dekewtişê dewe de, wesayîtê keyeyî ame vindarnayîş.
Grûba nîjadpereste, dima ra keyeyî rê va, "Îta Komara Tirkiya ya, şima senî eşkenê bi Kurdkî qisey bikerê?" û keye derb kerd.
Keye, ke mîyanê înan de cinî û yew tuta 3 aşmine zî estbi, dima ke hêriş bi, bi îmkananê xo şî Nêweşxaneyê Sûke yê Mêrsînî.
Dima ke keyeyî şikayet kerd, hêrişkarî ameyî tepiştiş û şawîyay Mudîrîya Emnîyetî ya Tarsusî.
