Sazîya Îstatîstîkan ya Tirkîya (TUİK) reqamanê bêkarîye yê seba aşma Teşrîna Peyêne eşkera kerdî. Goreyê ney, Teşrîne de oranê bêkarîye bîyo %8.6. Oranê bêkarîye yo raştîn zî sey %29.1 tesbît bi.
Goreyê netîceyanê Cigêrayîşê Hêzê Karî yê Keyeyî; hûmara bêkaran a kesanê 15 serrîyan û pîlêran de, aşma Teşrîna Peyêne ya 2025î de goreyê aşma verêne 54 hezar kesî zêde bîye û bîya 3 mîlyon û 98 hezar kesî.
Oranê bêkarîye bi 0.1 puanî berz bi û resa sewîyeya %8.6î. Oranê bêkarîye camêrdan de %7.0 bi la cînîyan de sey %11.8 texmîn bi.
Hûmara kesanê ke îstîhdam bîyê zî goreyê aşma verêne 75 hezar kesî zêde bîye û bîya 32 mîlyon û 737 hezar kesî. Oranê îstîhdamî bi 0.1 puanî berz bi û bi %49.2. No oran camêrdan de sey %66.8 la cînîyan de sey %31.9 tesbît bi.
Bêkarîye grûba cîwanan ê 15-24 serrîyan de goreyê aşma verêne eynî mende û sey %15.4 ameye eşkerakerdene. Na grûba serran de, oranê bêkarîye camêrdan de %10.6 la cînîyan de sey %24.4 texmîn bi.
Oranê hêzê karî yo betalî, yo ke îstîhdamê eksîk, potansîyelê hêzê karî û bêkaran ra yeno pê, goreyê aşma verêne 0.6 puanî kewt waro û bi %29.1. Oranê yewbîyayeyî yê îstîhdamê eksîkî û bêkaran %18.7 bi, la oranê yewbîyayeyî yê bêkaran û potansiyelê hêzê karî sey %20.2 texmîn bi.
