Hîşa viraştî Grok, ke aplikasyonê platformê Xyî yo, dima ke tayê parekerdişî kerdî, hetê Tirkiya ra ame astengkerdiş. Seba parekerdişanê Grokî, vizêr şan vera ey xeylê reaksîyonî ameybî mojnayîş.
Goreyê îdîayan, hîşa viraştî bi şîroveyanê şuxulnayoxan ame manîpulekerdiş û derheqê Serekkomarê Tirkîya Tayyîp Erdoganî û xeylê nameyanê bînan de parekerdişê heqaretî kerdî.
Nê parekerdişan ser o, Serdozgerîya Komare ya Anqara derheqê şuxulnayîşê Grokî de bira astengkerdişî da. Eşkerayîya dozgerîye de ame vatiş ke derheqê Grokî de zabitname ameyo amadekerdiş û seba qedexeyî muracatê Dadgeha Cezaya Sulhî ameyo kerdiş. Eşkerayîye wina dewam kerd: "Dadgehe bira qedexekerdişî da û seba ke bira bêro teblîxkerdiş, nuşte şawito Sazîya Teknolojîyanê Agahî û Îrtîbatî (BTK) rê."
Eşkerayîya platforma Xyî
Platforma Xyî zî derheqê parekerdişanê Grokî de na agahîye pare kerde: "Ma hayîdarê parekerdişanê Grokî yê û seba ke nê parekerdişê nêbaşî bêrê wedaritiş, ma bi hawayêko çalak xebitîyenê. Dima ke ma na rewşe ferq kerde, ma tedbîrî girewtî ke xAI Grok platforma X ser o nuşteyanê wînayîyan pare nêkero. xAI, zehno sûnî tena seba cigêrayîşê raştîye perwerde keno.."
