ZAZAKÎ NEWS - Serekê Amerîka Donald Trump û Serekê Rusya Vladimir Putin ewro eyaletê Alaska yê Amerîka de yenê têlewe. Pêvînayîşo ke yeno pawitiş ke pêvînayîşanê tewr krîtîkan ra yew bo, do Elmendorf-Richardsonî de virazîyo. Rojeva serekî de krîzê Ukrayna û têkilîyê di welatan est ê.
Seba kombîyayîşo ke yeno pawitiş çend saetan bidomno, tedbîrê asayîşî ameyî girewtiş.
Teklîfê Trumpî seba pêvînayîşê 15ê Tebaxe hetê Serekê Rusya Putînî ra amebi qebulkerdiş.
Her serekî, dewrê serekîya verêne ya Trumpî de reya verêne serra 2017î de Almanya de ameybî têlewe. Herçiqas ke meselayanê sey Sûrîye, Ukrayna û têkilîyanê di hetan de tayê xalan ser o pêameybî zî, pêvînayîşanê bînan de zaf netîce dest nêvistbi.
Erdanê Amerîka ser o pêvînayîşo yewin
No pêvînayîş, seba ke erdanê Amerîka ser o yo, reya yewine ya ke her di serekî rî bi rî yenê têlewe.
Trumpî, par Amerîka de reya dîyine sey serek ame weçînitiş, wexto ke dest bi wezîfeyî kerdo, a roje ra hetanî nika çend reyî bi rayîrê têlefonî Putînî reyde qisey kerdo. Her di rayberan, bi mîyancîtîya Temsîlkarê Xusûsî yê Rojhelatê Mîyanênî yê Trumpî, Steve Witkoffî, yo ke şîyêne Rusya, têkilîyê xo domnayî.
Dima ke Witkoff 6ê Tebaxe de Qesra Kremlînî de hetê Putînî ra ame pêşwazîkerdene, amebi eşkerakerdene ke her di rayberî do 15ê Tebaxe de Anchorageyî de bêrê têlewe.
Pêvînayîş de, yeno pawitene ke rayîrê çareserkerdişê krîzê Ukrayna, weşkerdişê têkilîyanê Rusya-Amerîka, meselayê stratejîkî yê nukleerî û meselayê herêmîyan ser o bêro vindertene.
