ZAZAKÎ NEWS - Semedê nêweşîya tebeqî, 81 wîlayetan de Bazarê Heywanan ame girewtene!
Tirkîya de, 81 wîlayetan de, semedê zêdebîyayîşê nêweşîya tebeqî (şap), bazarê heywanan ameyî girewtene.
Mudirîya Pêroyî ya Werd û Kontrolî ya Wezaretê Zîret û Daristanan ê Tirkîya, mudirîyanê 81 wîlayetan rê yew nuşteyo bi kodê "lezabez" şirawit û eşkere kerd ke pêro bazarê heywanan hetanî yew fermanê diyînî ameyê girewtene.
Nuşte de ame destnîşankerdene ke semedê Roşanê Qurbanî ra hereketê heywanan zaf bîyo û nê sebebî ra, nêweşîya tebeqî, ya ke sey janî (salgin) vila bena, de zêdebîyayîşêko cîddî ameyo tesbîtkerdene.
Eşkerayîye de ame îfadekerdene ke semedê na rewşe ra, tedbîrê karantîna ameyê girewtene, heywananê nêweşan ra nimûneyî ameyê arêdayene, hereketê heywanan ameyo sînorkerdene û seba zêdekerdişê hayîdarîye, perwerdeyî û tetbîqatê sehayî ameyê viraştene.
