Gulistan Korban
Gelo şima zanê Gaxan û Serê Salê mîyanê Kurdan de çi wextî ra nat pîroz benê?
Her çiqas tem nêzanîyeno mîyanê Kurdan (Zazayan û Kurmancan) de edetê "Serê Salê"çi wextî ra nata yeno pîrozkerdiş zî, goreyê nuştoxo Kurd Zana Farqînî ra, goreyê Teqwîmê mîladî ra pîrozkerdişê serra newîye ronîyayîşê Komare ra dima mîyanê Kurdan de vila bîyo. Farqinî vano, “Ayra mîyanê şarî de "goreyê hesabê ma û goreyê hesabê Tirkan" vatişêk esto”
Goreyê Teqwîmê Mîladî ra 1ê Çeleyî de serra newîye yena pîrozkerdiş, labelê mîyanê Kurmancan û Zazayan de goreyê Teqwîmê Rûmî 13 û 14ê Çeleyî de serra newîye yena pîrozkerdiş. Kurmancî tira vanê “Serê Salê”.
No edet mîyanê Kurdan de wîna yo; Cinîyî kincanê camêrdan, camêrdî zî kincanê cinîyan danê xora. Cinî û camêrdî keye bi keye gêrenê. Def û erbanê danê piro û bi no qayde pê keyf kenê.
Nuştoxo Kurd Zana Farqînî derheqê nê edetê Kurdan de Zazakî Newsî rê qisey kerd.
"Goreyê hesabê ma û goreyê hesabê Tirkan"
Farqînî da zanayîş ke pîrozkerdişê serra newîye ronîyayîşê Komara Tirkîya ra dima kewto mîyanê kulturê Kurdan û wîna va “Ayra mîyanê şarî de "goreyê hesabê ma û goreyê hesabê Tirkan" vajîyeno. Qestê hesabê ma Teqwîmê Rûmî yo. Zanîyeno ke mabênê nê hasabî de 13 rojî ferq esto.”
“Ma ê rojî bi heyecan pawitêne”
Zana Farqînî behsê demê gedeyîya xo kerd û va “Ez qezaya Amedî Farqîn de maya xo ra bîya. Ma pê heyecan roja Serê Salê pawitêne. Verê roja Serê Salê ma mîyanê xo de mişewre kerdêne ke wa kam bibo kalik kame biba pîrike. Ma keyeyê ke ma do şêrê kifş kerdêne. Ma çî-mîyê werdişî sey bastêq, gozî, încîr û êmîş, saye û firtiqalî dayêne arê.”
“Armancê Gaxanî û Serê Salê yew ê”
Farqînî behsê mabênê Gaxan û Serê Salê de zî nê çîyî vatî “ Şayîya Khal Gaxanî hewteyê hîreyînî yê aşma Kanûne de (21ê Kanûne) de dest pêkeno û hetanî hewteyê yewinî yê aşma Çeleyî dewam kena.
Goreyê mi hetê terîfkerdişî ra Gaxan û Serê Salê eynî çî yê Gaxan/Gaxand, Baba mîyanê Kurdanê ma yê Elwîyan de pîroz beno. Yeno mi vîr serran ra verî ez Îstanbul de şibîya şayîyêka Sêwasijan û ez uca de bîya şahadê pîrozkerdişê şayîya Gaxanî. Înan de Khal Gaxan, veyve û reşiko ke musalatê veyve bîyo estê. Keye bi keye gêrenê, gemin û rûn arêdanê. Tabî êdî kamî çi da înan. Çî-mîyo ke yeno arêdayîş badê yew keye de yeno pewtiş û werdiş. Bi taybetî werdo bi nameyê şir/babiko pewjenê. La mi mabênê Gaxan û Serê Salê de ferqêko pîl nêdî”
Zazakî News
