ZAZAKÎ NEWS - Vejîyayîşê Amedsporî yê Lîga Sûpêrî Amed de bî keyfêko pîl ame pîrozkerdiş. Programê "Merasîmê Kûpa û Pîrozbayîya Şampîyonîye" Parqa Newrozî yê qezaya Baglarî de virazîya. Rayedarê klûbî, heyetê teknîkî û fûtbolbazî pê otobusê taximî ameyî parqe. Program de pê fîşenganê hewayî hunermendî vejîyayî sehne.
Nahît Eren: "Ma bi saya şima qezenc kerd" ,
Serekê Klûbî Nahît Erenî merasîm de qisey kerd û taximê Mardin 1969 Sporî pîroz kerd ke vejîyabi Lîga 1. Erenî waşt ke Mardin zî nêzdî de vejîyo Lîga Sûpêrî û va: "Ma sey Amedsporî serkewtişêko pîl gîrewt, ma bi saya şima qezenc kerd. Ma pîya xemgîn bîyî, ma pîya hêrs bîyî, ma pîya rayîr şîyî û ewro ma na kûpa arda nê şaristani. Ma qet bawerîya xo vîndî nêkerde, ma şima rê bawer kerd."
"Ziwan û kulturê Amedsporî seba aşîtîye yo"
Erenî qiseykerdişê xo rê wina dewam kerd: "Ganî her kes bizano ke ziwan, reng, nasname û kulturê Amedsporî seba aşîtî, rindîye, bîratî û dostanîye yo. Ma pîya ser kewtî. Verê her çî ez futbolbazanê ma pîroz kena ke înan no serkewtiş viraşt. Ez heyetê teknîkî, xebatkaran û terefdaranê Amedsporî pîroz kena ke bi serran o kede danê."
Serekê taximî û qeleparêz Erce Kardeşler zî xebatkaranê klûbî rê spas kerd. Dima qiseykerdişî futbolbazî vejîyayî sehne, madalyayê xo gîrewtî û kûpaya şampîyonîye berz kerde. Asmên ser o bi dronan bi Tîrkî û Kûrdkî "Şampîyon Amedspor, ma ser kewtî, ma ameyî" ame nusînayîş.
Program de Serekê DTSOyî Mehmet Kaya, Sereka Şaredarîya Bajarê Pîlî Ayşe Serra Bucak Küçük, Alîkarê Serekê CHPî Sezgîn Tanrikulu, temsîlkarê dezgehanê sîvîlan û zaf karsazî zî ameyî têhet.
Xebere Enwer Yılmaz
