Pasûrijê ke Bursa de ciwîyenê, seba ke mîrasê xo yê kulturî bidê ciwînayîş û hemşehrîyanê xo bîyarê têhet, "Komeleya Pasûrijanê Diyarbekirî ya Bursa" rona. Merkezê komele yo newe, bi awayêko resmî dest bi xizmet kerd.
Amancê komele no yo ke gireyê mîyanê hemşehrîyan xurt bikero û kulturê Pasûrî biresnê neslanê ameyoxan.
Merkezo ke akerdişê ci ame kerdiş, sey cayê sohbet, parekerdiş û piştîdayîşî ame plan kerdiş.
Serekê Komele Vezîr Yildirimî akerdiş de nê qiseyî kerdî:
"No ber, seba Pasûrijan û heme hemşehrîyanê ma yê ke wazenê têhet bibê, akerde yo. Ma tena seba pawitişê kulturê xo nê, ma seba ke kulturê xo bi rindekîyêka edebî bidê ciwînayîş tîya yê."
Îdareyê komele zî da zanayîş ke, "Ma tena seba ke kulturê xo bidê ciwînayîş tîya yê. Merkezê ma yo newe do seba heme hemşehrîyanê ma bibo banêk. Ma heme hemşehrîyanê xo dawetê çay û sohbet kenê."
Pasûrijê ke Bursa de yê, binê banê komele de bi çalakîyanê sosyal û kulturîyan wazenê ke cuya hemşehrîyanê xo rehet bikerê û zengînîya xo ya kulturî bipawê.
Komele, seba cenazeyan do sey keyeyê serweşîye zî xizmet biko û pawîyeno ke mabênê şarî de bibo pirdêkê piştîdayîşî yo xurt.