Resul Yıldırım

Kurdî; înkar, asîmîlasyon, qetlîyam, çinêbîyayîş

Kurdî; xoverdayîş, lehengî, yewbîyayîş, serkewtiş

Rojeva kurdanê neteweperweran enê yî. Yew kîşt de gonî yew kîşt sulh, yew kîşt de qirkerdiş û qetlîyamî yew kîşt de xoverdayîş û serkewtiş, yew kîşt de adir û şer yew kîşt de awe û azadî, hasilê kelam yew kîşta ma de zimistan yew kîşta ma de wesarê welatê koyan.

Çi heyfo ke zafê partî û hereketê kurdan seke enê rojevanê kurdan nêvînenî. Xo danê serê niçikê koyan û şarê kurdî dekenê binê dere û dolan. Zafê wextan realîteya kurdan peygoş kenî. Kurdî ha mîyanê çerxanê asîmîlasyon de canê xo danî, ê şinê kewenê meseleyanê sunî û bejikan dima.

Hereketê kurdan ganî eyro bikewî rojevanê raştan û realîteya kurdan dima. Verba enê laserê asîmîlasyonî de vinderî û seba estbîyayîşê Kurdan bixebetî. Dejê Kurdan sivik bikerî û derdanê înan ro melheman vînî. Qijanê înan pize de hêvîya rojanê weşan ganî bikerî. Eke nêkenî wa serê Kurdan de versî zî nêkerî.

Realîteya kurdan peygoşî nêwazena, can û ruh ra xebate wazena. Çunke Kurdî verba çinêbîyayîşî şinî. Mîyanê enê halî de wa nêşiyerî nêkewî çîyanê sunî û Kurdan ra dur dima.

Yew mileta gird û qedîm ha verê çimanê înan de roje bi roje helîyena, hemîyena la ê şiyê kewtê LGBT û nêzana Biratîya Şaran(halkların kardeşliği) û çi çi dima. Heta ke reqîbê to, to sey yew şarî nêvîno ti çawa ey dir benî seypey û bira. Pîlanê ma vato "Biratî bi bar-an..." Merdimo ke qebul nêbo nêbeno bira û o ke bira nîyo zî barê ey zî çin ya. Kîşta bîne de Kurdî zafane Sunî, Elewî, Caferî Musluman ê, Êzîdî, Xirîstîyan û dînanê bînan ro tabî yê. Se bîyo bi enê partî û hereketanê Kurdan ke ena realîteya eşkera ser o hema zî şinê kewenê LGBT dima. Karê ma çin yo, derdê ma çin yo û ma şi bikewe înan dima. Û LGBT zî goreyê enê dînan ra Heram û rayîrîravejîyayîşo.

Eke vengê ma şino reseno înan wa cewabê ma bidî. Êyê ke rey daya şima û şima kerdî wêkîlê xo seba çi rey daya şima û seba çi şima sey wêkîlî wêçînayî?

Êyê ke rey daya şima mîyane ra se de çend LGBT yî?

Mîsyon û Vîzyono ke şima xo rê nusenî û nawenî goreyê kamcîn realîteyê Kurdan ra nusîyayî?

Mîyanê partî û hereketanê şima de meseleyê serekeyî çi yê?

Şima cewab bidêne ma zî têdir biwane.

21.09.2026