Rojnamewan û roşinvîr Mûsa Anter, Taxa Cumhûriyetî ya Seyrantepeyê Amedî, kuçeyê 442yine de serê merzelê xo yê şehadetî de ame yadkerdene.
Mûsa Anter kam o?
Mûsa Anter serra 1920î de dewa Zivinge ya girêdayeya Nisêbînê Mêrdînî de ameyo dinya. Mektebê verênî Mêrdîn de, mektebê mîyanên û lîse zî Edene de wendî. Dima ra Fakulteya Huqûqî ya Zanîngeha Stenbolî qedêna. Maya ey Fesla Xanime, muxtaranê verênan ê cinîyan yê Tirkîya ra yew a.
Serra 1944î de kênaya Evdirehîm Rehmî Zapsuyî, Ayşe Hale reyde zewicîya. Nê zewacî ra serra 1945î de lajê ey o pîl Anter, serra 1948î de kêna ey Rahşane û serra 1950yî de zî lajê ey o qij Dîcle ameyî dinya.
Reya verêne serranê wendekarîya xo de, dewrê Serewedarnayîşê Dêrsimî de ame tepiştiş. Seba ke maya Mustafa Kemalî rê heqaret kerdo, 45 rojî nezaretxane de mend. Anterî dima bi Canip Yıldırım û Yusuf Azizoğluyî reyde rojnameyê İleri Yurtî vet. Seba şîîra xo ya bi kurdkî "Qimil"î serra 1959î de Doza 49an de bi waştişê îdamî ame muhakemekerdiş.
Derbeya 27ê Gulane ra pey bi efû ame veradayîş. Zindan ra dima kovaranê Deng, Barış Dünyası û Yönî de nuşt. Serra 1963yî de na rey zî Doza 23yan ra kewt zindan. Zindananê Mamak, Sultanahmet, Balmumcu, Seyrantepe û Nisêbînî de mend.
Derbeya 12ê Êlule de zî seba propagandaya "kurdîyetîye" ame tewqîfkerdiş. Cuya xo de pêro pîya 11 serrî û nêm zindan de vîyarna. O awankeranê DDKO, HEP, NÇM û Enstîtuya Kurdî ya Stenbolî ra yew bi.
Anter 20ê êlula 1992yî de Seyrantepe de rastê hêrişê çekdarî ame. Hetê çepî ra di guleyî, qelb û sereyê ey ra zî guleyêk eştî ci û ame qetilkerdiş. Nuştox Orhan Miroğlu zî eynî serebût de birîndar bi. Mensûbê verên yê JÎTEMî Abdulkadir Ayganî eşkera kerdbi ke Anter hetê tîma ke o zî mîyan de bi ra seba JÎTEMî ame kiştene. Raporê Susurlukî yo Kutlu Savaşî de zî ca girewt ke hêriş Mahmut Yıldırım (Yeşil)î organîze kerdo.
Mezelê ey dewa Zivinge ya Nisêbînî de yo.
Kitabê ke nuştê:
· Birîna Reş (1959)
· Qimil (1962)
· Ferhenga Kurdî-Tirkî (1967)
· Bîranînên Min I (1991)
· Bîranînên Min II (1992)
· Vakayiname (1992)
· Fırat Marmara’ya Akıyor (1996)
· Çinara Min (1999)
