Mabênê Odaya Sanayî û Bazirganî ya Amedî (DTSO) û Odaya Sanayî û Bazirganî ya Dêrsimî (TTSO) de protokolê biratî esto û semedo ke mabênê her di şaristanan de sermayegozarî aver şêro Dêrsim de kombîyayîş ame kerdene.
Dêrsim de semedê sermayegozarî û îstîhdamî sazîyê karsazan ê her di şaristanan panelêk de ameyê têlewe.
Kombîyayîş, Dêrsim de 2 rojî dewam kerd û peyê panelî de mabênê her di şaristanan de protokol ame îmzakerdiş.
Serekê Meclîsa Odaya Sanayî û Bazirganî ya Amedî (DTSO) Nevîn İl û Serekê DTSOyî Mehmet Kaya, Sereka Meclîsa TTSOyî Sevim Şengezer û xeylê kesê eleqedarî panel de qisey kerdê û behsê çareserîyan kerdê.
Serekê Odaya Sanayî û Bazirganî ya Amedî (DTSO) Mehmet Kaya vano ke, “ semedo ke ma bieşkê şaristananê xo de vernîya koçkerdişan bigîrê ma projeyan virazenê. Dêrsîm zî yê ma wo. Ma verê cû Dêrsimî dir protokolê biratî viraştbi. Semedo ke ma ena biratîya xo aver berê xebatê ma dewam kenê. Semedê ney qerarê ma yê meclise esto. Dêrsim cayêko zaf weş o. Her het ra weş o. Semedo ke ma bieşkê tîya de îstîhdam peyda bike gere ma xebatan bike û projeyan hazir bike.”
