Şarê Dêrsim û Platformê Kede û Demokrasî yê Dêrsimî ewro vera hêrişanê ke Rojavayê Kurdistanî ser o benê eşkerayî da. Eşkerayî, nameyê platformî ser o Hemserekê Şarîstanî yê Dêrsimî Ozcan Ateşî wende. Eşkerayî ra dima Parlamenetera Dêrsîmî Ayten Kordu zî qisey kerd.
Eşkerayîye de wîna ame vatiş:
“Hukmatê demkî yê Şamî û çeteyê cîhadîstî yê girêdayeyê ey ganî hêrişanê xo yê vera Kurdanê Rojawanî cade bivindarnê!!!
Nê hêrişê rejîmê Şamî vera îdareyê seypê, demokratîk û xoserî ke Rojava de bi rayberîya cinîyan, bi xoverdayîşê şarî ame viraştene, tehdîtêko gird ê. Nê hêrişê ke hetê hêzanê girêdayeyê Hukmatê Demkî yê Şamî ra yenê ramitene, tena polîtîkaya şîdetî ya vera şarê kurdî nîya; eynî wext de hêrişê vera cigêrayîşê çareserîya demokratîke ke bi bingeyê seypêbîyayîşê şaran û îradeyê pîyaciwîyayîşî yeno waştene ke Sûrîye de bêro awankerdene, û hêrişê vera tecrubeyanê îdareyê xoserî yê demokratîkî yê Rojawanî ke bi têkoşînê şaran o hempar şekil girewto.
‘Zîhnîyetê IŞID’î qirkerdena Dêrsîmî de zî bî’
Wekîla Dêrsimî Ayten Korduye qiseykerdişê xo de wina va: ”IŞID teyna Sûrîya de nîyo, ma zîhnîyetê IŞIDî qirkerdena Dêsîmî de zanê. Seserrîyo Kurdî çar leteyê û şima seserrîyo kurdan qir kenê. Dewleta tirke kurdan inkar kena. Ma kurd û qomê elewî zanîme ke teyna yew raye esta, a kî raya demokrasîya. Rojavayî mîyanê rojhilatê mîyanênî de raya xo dîya, aştîye vazenê. Qomê rojawayî pêro pîya jû ca de rê. Dinya naye bizano ke Rojava teyna nîyo. Qomê Dêrsimî hetê şarê Rojavayî de ro.”