Hetê Enstîtûya Diyarbekirî ya Cigêrayîşanê Sîyasî û Cimatkî (DÎSA) ra ewro Dîyarbekir de semînerêk ame tertîpkerdiş.
Qiseykerdoxê Kurdolojîyê DİSA no hewte Doç. Dr. Nurettîn Beltekîn bi. Nurettîn Beltekînî bi nameyê “Îran ra bi Kirdane: Koçê Zazayan" pêşkêşîyêke kerde.
Xeylê kesayetê naskerdî, temsîlkarê partîyanê sîyasî yê Kurdan û roşinvîrî zî ameyî semîner goşdarî kerd.
Moderatorîya semînerî zî hetê Şahismail Bedirhanoğluyî ra ame kerdiş.
Doç. Dr. Nurettîn Beltekîn îzah kerd ke, Zazayan mîyanê tarîxî de tim xo sey Kird name kerdo, cayo ke tede cuyenê ra zî vato Kirdane û wîna va; “Goreyê cigêrayîşê mi Zazayî cêr û cor ra di qolan ra ameyê cayo ke nika tede cuyenê. Qismêk hetê Kirmaşanî ra ameyê Dêrsim, qismêk zî hetê Herêma Kurdistanî ya Federale ra ameyê. Bi taybetî vilabîyayîşê Îslamîyetî ra dima hîna zaf koçê tîyayî kerdê. Zazayî bi xo qolêkê Kurdan ê. Tabî tarîxê ma çi heyf ke nuştekî nîyo. Ma vatişan ra tay çîyan deşîfre kenê û musenê”.
Şima eşkenê video ser ra pêroyê qiseykedişê Doç. Dr. Nurettîn Beltekînî goşdarî bike.
Xeber û Vîdeo / Enwer Yilmaz
