Yulia Burtseva ya 38 serre, a ke bajarê Napolî yê Îtalya de ciwîyena û medyayê sosyale de bi vîdeoyanê ke keyeyê x ora pare kena pê îna resaya bi hezaran teqîbkerdoxan, seba amelîyatê estetîkî şîye paytextê Rûsya Moskova û uca merde.
Ame musayîş ke fenomena 38 serre, seba prosesanê "butt-lift" yanî estetîka qine û sererastkerdişê pîzeyî kewta amelîyat.
Kewta şokê anafîlaktîkî
Goreyê îddîayan, wexto ke amelîyat dest pêkerd, leşa Burtsevaye vera madeyanê tibîyan ê ke operasyon de ameyê xebitnayîş, reaksîyonêko giran nîşan da.
Ame tesbîtkerdiş ke cinîya cîwane wextê operasyonî de kewta şokê anafîlaktîkî û maseya amelîyatî ser o merda.
Derheqê klinîkî de tehqîqat dest pêkerd
Dima nê mergê trajîkî, rayedaranê Rûsya dest bi cigêrayîşî kerd. Derheqê hedîseyî de tehqîqat ame destpêkerdiş û klinîko xusûsî ame padayîş.
Rayedarî cigêrenê ke gelo verê amelîyatî testê alerjîyî yê lazimî seba Burtsevaye ameyê kerdiş yan ney, û gelo wextê mudaxeleyê cerahî de îhmalêko tibî esto yan çin o.
