ZAZAKÎ NEW - Selçûk Tengîoglû o ke badê merasîmê yadkerdişê Wekîlê Serekê Meclîsî û Parlamenterê Îstanbulî yê Partîya DEMî Sirri Sureyya Onderî de hêrişê Serekê Partîya Şarî ya Komare (CHP) Ozgur Ozelî kerdbi, ame veradayîş.
Hêrişker Tengîoglû, Çaglayan de, Mehkemeya Cezaya Eslîye ya 44ine ya Stenbolî de, reya çarine vejîya verê mehkema.
Bi îdîaya "bi qestî birîndarkerdiş" heta çar serrî û nêm cezayê hepisxaneyî seba Tengîoglû ameyêne waştiş.
Mehkeme qerar da ke hêrişker Tengîoglû bêro veradayîş.
Se bîbî?
Selçûk Tengîoglû, 4ê Gulane de, badê merasîmê yadkerdişî yê Wekîlê Serekê Meclîsî û Parlamenterê Stenbolî yê Partîya DEMî Sirri Sureyya Onderî, ke Merkezê Kulturî yê Ataturkî (AKM) de amebî viraştene, hêrişê Serekê Partîya Şarî ya Komare (CHP) Ozgur Ozelî kerdbi.
Sirri Sureyya Onder, 3ê Gulane de, nêweşxaneyo ke tede ameyêne tedawîkerdiş de, wefat kerdbi.
