ZAZAKÎ NES– Rêxistina Heqanê Merdiman a Îranî (IHR), ke merkezê aye Norwec de yo, derheqê îdamanê Îranî de raporêk weşana. Rêxistinê destnîşan kerdo ke rejîmê Îranî emser tewr tay 1000 kesî îdam kerdê. Goreyê raporê rêxistine, na hûmare 30 serranê peyênan de ya tewr berz a.
Goreyê xebera Rûdawî, rapor de amo îzahkerdiş ke tena hefteyo verên 64 kesî ameyî îdamkerdiş ke no yeno manaya rojane 9 kesan ra zêdeyêr yenê îdamkerdiş.
Midurê Rêxistina Heqanê Merdiman a Îranî Mehmûd Emîrî Muqedemî, nê îdamî sey “sûçê vera merdimîye” name kerd û waşt ke komela mîyanneteweyî reaksiyon nişan bido.
Mehmûd Emîrî Muqedemî va, “Komara Îslamî îdaman sey yew bahane seba cakerdişê terse û kontrolkerdişê komelî bikar ana.”