Mesud Barzanî, ewro Duhok de Fermandarê Hêzanê Sûrîyeya Demokratîke (QSD) Mazlum Ebdî qebul kerd. Pêvînayîş de Serekê ENKSyî Mîhemed Îsmaîl, sîyasetmedar Osman Baydemîr û tayê rayedarê bînî yê Rojava zî amade bîy.
Serek Mesud Barzanî, heyetê Rojava yo ke seba Forumê Aştî û Ewleyîye yê Rojhelatê Mîyanênî Herêma Kurdîstanî de yo, qebul kerd. Mîyanê heyetî de Fermandarê Pêroyî yê QSDyî Mazlum Ebdî û Hemsereka Komîteya Têkilîyanê Teberî ya Rêveberîya Xosere ya Rojava Îlhame Ehmed zî estbî.
Ofîsê Barzanîyî ra derheqê pêvînayîşî de eşkerayîyêke amey dayene. Goreyê eşkerayîye, kombîyayîş de Mesûd Barzanîyî memnunîyetê xo ard ziwan ke her di hetî zî pîya tewrê Forumê MEPS 2025î yê Duhokî bîyê. Endamanê heyetî zî, seba rolê ey ê pawitişê dewaya meşrû ya şarê Kurdî, Serek Barzanîyî rê sipas kerd.
Dima ra rewşa Sûrîye û herême ser o fîkrî ameyî parekerdene.
Barzanî: Ganî heqê Kurdan nêrê binpaykerdene
Serek Barzanî va ke ganî persa Kurdan çarçeweyê "Sûrîyeya Newîye" de bi awayêko demokratîk û aştîyane bêro çareserkerdene û xetayê verênî bêrê raştkerdene û newe ra nêbê. Serek Barzanîyî bale ante serê muhîmîya sebir, aheng û yewîya mabênê hêz û hetanê sîyasîyan ê Kurdan û da zanayene ke ganî heqê şarê Kurdî nêrê binpaykerdene.
Ebdî ra sipas
Beşêko bîn yê pêvînayîşî de, Fermandarê QSDyî Mazlum Ebdî zî seba ke ameyo dawetkerdene Forumê MEPS 2025î, Serewezîrê Herêma Kurdîstanî Mesrûr Barzanîyî rê sipas kerd. Ebdîyî, seba xebatanê Serek Barzanî yê "seba nêzdîkerdiş û awankerdişê yewîye mabênê hetanê Rojava" pesnê ey da.
Ebdîyî îfade kerd ke ê qedr danê ci ke Herêma Kurdîstanî serranê peyênan de berê xo şarê Rojava rê akerdo, ca dayo înan û seba qedênayîşê terorî paştî daya.
Tehlukeyê newe ra vejîyayîşê DAÎŞî û paştîdayîşê prosesê çareserîya aştîyane yê Tirkîya zî rojdemê bînî yê pêvînayîşî bî.
