Hunermendî Metin & Kemal Kahraman, amadekarîya yew konserêko xusûsî kenê. Konser, 6ê Kanûna 2025î de, şanê Şemeyî, Amed de Merkezê Kulturî yê Çand Amed / Sezaî Karakoçî de do bêro viraştene û no do bibo pêvînayîşêko xusûsî ke her di birayî Anadolu Quartetî reyde vejîyênê sehne.
Albumê ke 25 serran dima newe ra yeno sehne ser, tena yadkerdişêko nostaljîk nîyo; hetê newe ra ganîkedişê hîşê kulturî ra zî muhîm o.
Konser, bi paştîdayîşê Anadolu Quartetî yo ke hetê vîrtuozê kemanî Ahmet Tîrgîlî ra yeno rayberdene, do bêro pêşkêşkerdene.
Program do di beşan ra bêro pê. Beşê yewinî de parçeyê albumê "Ferfecîr"î, beşê diyinî de zî eserê Metin & Kemal Kahramanî yê ke bi serran o bîyê klasîk, do bêrê vatene.
Bîlet û malumatê konserî
Bîletê konsero ke do 6ê Kanûne roja Şemeyî bêro dayene, platformanê Biletinial, Bubilet û Biletixî ser o; û cayanê sey Merkezê Çapî yê Canonî, Kastal Cafe, Gabo Kitchen û Mekan Beyrutî ra yenê girewtene.
Derheqê Hunermendan de
Metin & Kemal Kahraman, serra 1993î ra nat hem bi besteyanê xo hem zî bi eseranê tradîsyonê fekkî yê herêma Dêrsimî yenê naskerdene. Hetê xebatanê cigêrayîş-arêdayîşî de, îmzayê xo eşto binê xeylê albuman. Her di hunermendî, demê peyênî de yew serîyo newe yo ke çar albuman ra yeno pê û prosesê pandemî de dest pêkerdo, ey ser o xebitîyenê û nê ser o parçeyanê albumê Sumbulteberî weşanayene dewam kenê.
Anadolu Quartet o ke serra 2008î de ronîyayo, bi o qayde yeno naskerdene ke melodîyanê kulturanê cîyayan bi uslûbê muzîkê odeyî newe ra şîrove keno û heta ewro bi xeylê hunermendan reyde vejîyayo sehne.
