Resul Yildirim
Ez her firsetî de û her ca de vana ke ez demokrasî ra bawer nêkena û red kena çunke sebebê mi est ê. Mi çimê xo mîyanê dewleta demokratîk de akerdî, mîyanê zuran û mîyanê dek û dolaban de. Belkî ez mîyanê dewleta demokratîk de do çimanê xo bigêrî. Çi heyf…
Demokrasî, verê mîladî de bajaranê Yunanan de welidîya. Înan xeyrêk tede nêdî û ey sey yew merdeyî kerd binê herre. Di hezar serrî badê yew o xînt şi ey uca ra vet û kerd muselletê dinya. Bi 200-250 serrîyo ke nameyê ci însan o mireno, mergê ey de demokrasî rê bare est a û demokratan rê zî. Mesela Şêx Seîd û embazê ey mesela Seyîd Riza û şarê Dêrsimî ûsn. însanî bi destê demokratan qetil bîyê. Ez demokrasî û peyayanê ey û qetilkerdoxan lexnet kena.
Nê rojanê peyînan de rojaneyê herkesî de yo ke hukmatî dest nayo tayê şaredarîyanê Kurdan ser o, xesp kerd ê. Nika şima vanê "hem ti vanê ez demokrasî ra bawer nêkena hem zî ti vanê hukmatî heqê kurdan xesp kerdo." Şima raşt vanê ez bawer nêkena dek û dolabanê înan ra labelê ez bawer nêkerî zî tîya de heqê tayê însanan estbi, fikrê tayê însanan û wêçînayîşê tayê însanan estbi û destê înan ra bêwaştişê înan gêrîya. Xesp bi. Çi wextî ke ma însanî ma edelet payanî ra tepişt o wextî ma benê medenî û ma benê însan.
Eke eyro ez vengê xo nêkerî siba neheqîye bêro mi ser o şima vengê xo nêkerî o wextî serdest û zorbeyî verê xo danê heme fikranê cîyayan û înan kor kenê. Seba însanetîye ganî ma dînan û mezheban, fikran û qewman, sîsteman û rayîran cîya nêker ke ma edelet payanî ra tepiş. Seke Rebbê aleman, Quranê pîroz de vano "...hêrsê şima yo ke qewmêk ro est o wa şima sewqê bêedeletîye nêkero…"
Xoverdayîşêko sereberz lazim o eyro verbi heme firewnanê modernan de. Heqê kurdan ganî bidêyo înan û mexdurîyetîya înan biqedîyo. Feqet no mumkun nîyo çunke şima nêeşkenê sîstemê dizdîye de dizdan rê dizdîya înan, bi sîstemê înan îspat bikerê. Kam dizdîya xo qebul keno û vano "ez dizd a". Kîşta bîn de ez partîyanê Kurdan rê zî heyret manena çunke ça de yew însano bisabiqa û bimehkema est o ey namzet ronenê û kenê serok/hemserok. Xora hukmate sey yew delverge ha ronayeyê seydê xo ya. Adir fekê aye ra perreno. Însanan wena, goştê înan cawena feqet nêzana ke qeyûm nêerzîyeno aqilê însanî û fikranê însanî ser o.
