Romanê Newzad Valêrî yo bi nameyê "Demserrê Vîrî" çap bîyo.
Newzad Valêrî yo ke ziwanê ma de eseranê qîmetinan nuseno, ena hewe pê romanêk vejîyeno verê wendoxanê xo.
Kitabê Valêrî 208 rîpel o û Weşanxaneyê Avestayî ra vejîyayo.
Serebûtê ke romanê "Demserrê Vîrî" de ca gênê, cayanê sey Çewlîg, Dara Hênî, DÎyarbekir, İstanbul, Berlin û Hamburg de vîyarenê.
Roman dormaleyê yew Dapîra nezdîyê se serre û tornê aye Murad de (xort û Almanya de cuyeno) qewimiyenê. Dewi, bajar, kultur, koçkerdiş, surgun, welat, eşq û cuya modernîte roman de ca genê.
Newzad Valêrî cayêkê romanê xo de wîna nuşto;
"Ez verê cû zî fikirîyabîya, rast yan xelet, hewl yan xirab ganî ez dara xo ra bikewtêne û biameyêne tîya. Serebûtêko bêtaleh amebî sereyê mi, ê tena bîbîy wesîleyê na raywanîya min a derge. Bi rastî zî mi dî ke, nişka vernîya mi de no rayîro newe bî derg û ez zî ca bi ca gêraya û peyê aqubetê xo ra ameya. Sey dengbêjanê welatê xo yê ke ê gan danê vengan, sey xalê xo Dengbêj Filîtî, ez zî kewta rayîran, dûrî ra dûrî şîya. Çend serrî yo ke ez ge bajaran, ge herêman, ge welatan ra gêrana. Koçkerdiş, surgunbîyayîş û warê xo ra remayîş sey tayê merdiman bîbîy barê mi zî. Remayîş birînêk o."
Derheqê Newzad Valerî de
Newzad Valerî: 1975 de qezaya Dara Hênî ya Çewlîgî de ameyo dinya. Edebîyat û ziwanê Tirkî ser o perwerdeyê lîsansî dî û dime ra zî derheqê edebîyatê tirkî de master û doktora kerdî. Edebîyat û folklorî ser o xebetîyayo, dorûverê Çewlîgî ra û sewbîna şarîstananê kirdan/kirmancan ra zî tayê nimûneyê folklorî arê dayî.
Seba têvernayîşê edebîyatê kirdkî, kurmanckî, tirkî û fariskî xebatî kerdî. Tirkî û fariskî ra tayê şîîrî açarnayî kirdkî ser. Kovaranê sey Vate, Şewçila, Ewro, Nûbihar, Tîroj, Bar û Herd; rojnameyanê sey Newepel, Bas Nûçe û Basî de xeylê şîîr, nuşte û tercumeyê ey weşanîyayî.
Bi yew dosyaya xo ya şîîran 2007 Înstîtutê Ziwan û Kulturê Kirmanckî (Zazakî) yê Berlînî ra xelata yewine girewte. Çend şîîrê ey; Zinciriye Şairleri (Şaîrê Zincîrîye): Festîvala Şîîran ya Mîyanneteweyî ya Yewine de tercumeyê çend ziwanan bîyî.
Dejê Nimiteyî (şîîre) kitabê ey o verên o serra 2009î de, kitabê ey yo dîyin bi nameyê; Wexto Vîndîbîyaye (şîîre) serra 2016î de hetê Weşanxaneyê Vateyî ra weşanîyayî. Kitabê şîîranê Ehmed Arifî; Hasretinden Prangalar Eskittim bi nameyê; Mi Hesreta To Ver Qeydûbendî Kerdî Kehan açarna kirdkî ser û no kitab zî serra 2015î de hetê weşanxaneyê Vateyî ra ame weşanayene.
Bê nînan Sohrab Sepehrîyo ke şaîranê hemdem û namdaran yê İranî ra yew o, di kitabê ey ke hetê Valêrî ra bi nameyê; Rengê Merg û Raywan açarnîyayî kirdkî ser, serra 2020î de weşanxaneyê Peywendî ra weşanîya.
Kitabê arêdayîş û analîzê ey; Xerîb û Nasîb Çewlig ra Çewres Sanikî zî serra 2022î de hetê weşanxaneyê Peywend çap bîyo.
Şaîr, nuştox û açarnayox Valêrî, nika Anqara de ciwîyeno.
Zazakî News
